Канаданинг Макгилл университети ҳузурида ташкил этилган мустақил лойиҳа — TissueTinker компанияси инновацион технологиялар ёрдамида саратон ўсимталарининг 3D босма моделларини яратиш устида иш олиб бормоқда. Ушбу лойиҳа Макгилл Инновацион жамғармаси кўмагида йўлга қўйилган бўлиб, саратонга қарши дориларни синовдан ўтказиш жараёнларини такомиллаштиришга қаратилган.
Тадқиқотларда қўлланилаётган технология инсон тўқималарига яқин биоматериал тузилмаларни яратишга имкон беради. Бу эса ҳар бир бемор учун индивидуал даволаш усулини танлашда муҳим аҳамият касб этади.
Тадқиқотчилар тажриба доирасида бир хил биоматериалдан иккита модел яратган: бири соғлом тўқимани, иккинчиси эса ўсимта томонидан зарарланган тўқимани моделлаштиради. Бундай параллел моделлаштириш усули касалликнинг ривожланиш динамикасини юқори аниқликда кузатиш имконини беради.
Ушбу методологиянинг муҳим жиҳатларидан бири — 3D босма моделларининг микроскопик аниқликда тайёрланишидир. Тадқиқот гуруҳи ўлчами атиги 300 микрон бўлган моделларни ҳам яратишга эришган. Компания ҳаммуассиси Бенжамин Ринглернинг таъкидлашича, бу миқёс ўсимта ичида кислород етишмаслиги кузатиладиган — гипоксик ядролар деб аталувчи зоналарни таҳлил қилиш учун айни муддаодир. Айнан шу ҳудудлар касалликнинг агрессив тарзда ривожланишида муҳим рол ўйнайди.
3D босиб чиқариш технологияси биологик намуналар тузилмасини аниқ созлаш имконини беради, бу эса тор ихтисослашган тадқиқотлар ва аниқ параметрлар асосида синовлар ўтказиш учун кенг имкониятлар яратади. Тадқиқотчилар илгари ҳаттоки лаборатория шароитида ҳам таҳлил қилиш имконсиз бўлган айрим жараёнларни эндиликда чуқурроқ ўрганишга муваффақ бўлмоқда.
Бундай мураккаб тажрибалар албатта махсус техник ускуналарни талаб қилади. Гарчи ҳаваскор биолойиҳалар учун мослаштирилган 3D принтерлар мавжуд бўлса-да, TissueTinker томонидан фойдаланилаётган принтер моделларининг номи ҳозирча ошкор этилмаган.
Шунга қарамай, лойиҳа онкологик касалликларни чуқурроқ тушуниш ва индивидуал даволаш ёндашувларини ишлаб чиқиш йўлида муҳим қадам сифатида баҳоланмоқда.
Изоҳ (0)