Британиялик олимлар АҚШда динозаврнинг янги — ит катталигидаги турини кашф этди. Бу ҳақда CNN хабар берди.
Бу тур тахминан 150 миллион йил олдин ҳозирги Қўшма Штатларда стегозавр ва диплодок каби динозаврлар билан бирга яшагани айтилмоқда. Enigmacursor mollyborthwickae деб номланган янги динозавр узунлигининг тахминан ярмини думи ташкил этади. Унинг labrador retriever ити билан бир хил ўлчамда экани айтилган.
Гарчи унинг кўплаб суяклари 2021—2022 йилларда Колорадо штатидан топилган бўлса-да, ўша пайтда унинг бош суяги ва умуртқа поғонаси қисмлари аниқланмаган. Шунинг учун олимлар мазкур динозавр турининг аниқ узунлигини билмаган. Скелет 26 июндан бошлаб Лондон табиацҳунослик музейида намойиш этилиши кутилмоқда. Ўтхўр динозавр узун орқа оёқларида юрган. Бу унинг йиртқичлардан тез қоча олгани ва жуда тез югурганини кўрсатади.
Динозавр номи скелетни музейга олиб келишда ҳомийлик қилган шахс — Молли Бортҳвик шарафига қўйилган. У лотинчада “сирли югурувчи” деган маънони англатади. Суякларни синчковлик билан ўрганган олимлар Маидмент ва Барретга кўра, ушбу намуна илгари аниқланган бошқа турларга ўхшамайди.
Хусусан, унинг сон суяги ўзига хос бўлиб, бошқа динозаврлардан турли хил мушак бирикмалари билан ажралиб туради.
“У Хитойда топилган 3 метр узунликдаги yandusaurus hongheenis динозаврига ўхшаб кетади. Бу турнинг кенг тарқалганини кўрсатади”, деган Барретт.
Изоҳ (0)