Умида Абдуллаева ва Мукаррам Нурматова Оила ва хотин-қизлар қўмитаси раиси ўринбосарлари бўлди. Бу ҳақда қўмита матбуот хизмати хабар берди.
Маълум қилинишича, бугун Оила ва хотин-қизлар қўмитасида Сенат раиси Танзила Норбоева иштирокида йиғилиш бўлиб ўтган.
Йиғилишда президент қарори билан лавозимга тайинланган қўмита раисининг биринчи ўринбосари Умида Абдуллаева ва раис ўринбосари Мукаррам Нурматовалар жамоага таништирилган.
Маълумот учун, қўмита раиси бош вазир ўринбосари Зулайҳо Маҳкамова ҳисобланади.
2022 йилнинг март ойида Ўзбекистонда Хотин-қизлар ва оила ишлари қўмитаси тузилганди ва унга Зулайҳо Маҳкамова раҳбарлик қилиши ҳақида хабар берилганди.
8 март куни эса Озода Парпибаева Оила ва хотин-қизлар давлат қўмитаси раисининг биринчи ўринбосари лавозимига тайинланган. Раъно Турдибоева ва Нодира Эгамбердиева Оила ва хотин-қизлар давлат қўмитаси раисининг ўринбосарлари бўлган эди.
2023 йилнинг январида Озода Парпибаева Камбағалликни қисқартириш ва бандлик вазирлиги ҳузуридаги Оила ва хотин-қизлар қўмитаси раиси лавозимига тайинланганди.
Қўмитанинг асосий вазифалари нималардан иборат?
- хотин-қизларни қўллаб-қувватлаш тизимини кучайтириш, уларнинг ижтимоий-сиёсий фаоллигини ошириш, ҳуқуқларини ҳимоя қилиш ва қонуний манфаатларини ифодалаш;
- эркаклар ва хотин-қизларнинг тенг ҳуқуқ ҳамда имкониятларини таъминлаш, хотин-қизлар ва оилани ҳар томонлама қўллаб-қувватлашга оид қонунчилик ҳужжатларини такомиллаштириш бўйича таклифлар ишлаб чиқиш;
- давлат хизмати, таълим, илм-фан ва инновация, спорт, соғлиқни сақлаш ҳамда бошқа ижтимоий-иқтисодий соҳаларда хотин-қизларни қўллаб-қувватлаш бўйича чора-тадбирларни ишлаб чиқиш ва амалга ошириш;
- иқтидорли хотин-қизларни аниқлаш ва қўллаб-қувватлаш тизимини такомиллаштириш;
- хотин-қизларнинг касбий кўникмаларини ошириш, муносиб иш топишига кўмаклашиш, тадбиркорлигини ривожлантириш;
- оила аъзоларининг ҳуқуқий маданиятини ошириш, улар ўртасида ҳуқуқбузарликларнинг олдини олиш, ижтимоий ходим ва бошқа давлат хизматчилари билан ҳамкорликда хотин-қизларни тазйиқ ва зўравонликлардан ҳимоя қилиш;
- оилаларда соғлом турмуш тарзини шакллантириш, соғлом овқатланиш ҳамда репродуктив саломатлик қоидаларини оммалаштириш;
- оила институтини мустаҳкамлаш, ижтимоий-маънавий муҳит барқарорлигини таъминлаш, умуминсоний ва миллий қадриятларни тарғиб қилиш;
- миграциядан қайтган, жазони ижро этиш муассасаларидан озод этилган, оғир ижтимоий вазиятга тушиб қолган хотин-қизларнинг ижтимоий мослашувига, улар билан манзилли ишлаш орқали зарур ёрдамлар олишларига кўмаклашиш;
- кейс менежментни қўллаган ҳолда, ижтимоий ҳимояга муҳтож хотин-қизларни аниқлаш ҳамда улар билан манзилли ишлаш;
- ўзига юкланган вазифаларни ўз вақтида ва сифатли амалга ошириш учун давлат ташкилотлари, халқаро молия институтлари ҳамда фуқаролик жамияти институтлари билан яқиндан ҳамкорлик ўрнатиш;
- маҳаллалардаги хотин-қизлар фаоллари фаолиятини мувофиқлаштириш ва уларга бириктирилган жамоатчилик тузилмалари билан ҳамкорликни таъминлаш.
Изоҳ (0)