Ўзбекистонда банклар топ-300 талик олийгоҳга кирган ёшларга 20 минг долларгача имтиёзли таълим кредити беради. Бу ҳақда 30 июнь куни президентнинг ёшлар билан учрашувида маълум қилинди.
Яқинда “Эл-юрт умиди” жамғармаси фаолияти такомиллаштирилганди. Энди топ-300 талик олийгоҳга кирганлар учун ўқиш ва яшаш харажатини қоплаш тизими янги тартибда ишлай бошлайди. Давлат раҳбарининг таъкидлашича, “Таълим — келажак сармояси” деган эзгу ғоя жамиятида катта ҳаракатга айланмоқда.
Энг аввало, STEM йўналишлари (илм-фан, технология, муҳандислик ва математика), энергетика, транспорт, урбанизация, архитектура, қурилиш, қишлоқ ва сув хўжалиги каби драйвер соҳалар учун квоталар бир неча карра оширилади.
“Гарвардчилар” мактаби Беруний номидаги халқаро мактаб сифатида фаолиятини бошлади. Ушбу халқаро мактабга бу йилги 8-синф битирувчилари орасидан 60 нафар ўқувчи саралаб олинади ва 3 та йўналишда ўқитилади. Келгусида ўқув ўринлари каррасига кўпайтирилади.
Умуман, миллий дастур асосида ҳар йили энг салоҳиятли 3 минг ўқувчи селексия қилиниб, Гарвард, Ел, Колумбия, Корнел каби дунёнинг нуфузли олийгоҳларига тайёрланади. Шундан камида 300 нафари эҳтиёжманд оила фарзандлари бўлади.
Тадбирда маълум қилинишича, Ўзбекистон ёшлари топ-500 талик олийгоҳларга кириш бўйича ўтган йили Марказий Осиёда 1-ўринни эгаллади. Бугунги кунда 30 нафар ёшлар дунёнинг топ-10 талик олийгоҳида, 500 нафари топ-100 ва 1 минг 500 нафари топ-300 дан жой олган нуфузли университетларда таҳсил олмоқда. Президент ёшларга сифатли таълим ва тарбия бериш, замонавий касб ва ҳунарлар, хорижий тилларни ўргатиш, ҳаётда муносиб ўрин топиши учун зарур шароитлар яратиш энг асосий вазифа эканлигини айтди.
Изоҳ (0)