Ўзбекистон ёшлари топ-500 талик олийгоҳларга кириш бўйича ўтган йили Марказий Осиёда 1-ўринни эгаллади. Бу ҳақда 30 июнь куни президентнинг ёшлар билан учрашувида маълум қилинди.
-OaY0ByPV.avif)
Шавкат Мирзиёев ислоҳотлар бошланган илк кунларданоқ “илм – тарбия – инновация” занжирини яратишга киришилганини, бу ҳаракатлар бугун аниқ натижалар бераётганини қайд этди.
Маълум қилинишича, ўзбекистонлик билимли ёшлар илк бор топ-5 таликдаги олийгоҳларга кириб, тарихий натижа қайд этди. Бугунги кунда 30 нафар ёшлар дунёнинг топ-10 талик олийгоҳида, 500 нафари топ-100 ва 1 минг 500 нафари топ-300 дан жой олган нуфузли университетларда таҳсил олмоқда.
Тадбирда айтилишича, 2024 йилда 150 мингдан зиёд ёшлар халқаро тил сертификатлари олди, бу 2023 йилга нисбатан икки баравар кўп. Хорижий тилларни мукаммал билиш бўйича Тошкент шаҳри, Фарғона, Наманган, Бухоро ва Самарқанд ёшлари анча илгарилаб кетди.
Ёшларнинг олийгоҳга кириш кўрсаткичи бўйича Сурхондарё бир йил ичида 11-ўриндан 4-ўринга кўтарилиб, катта сакраш қилди. Жиззах ва Сирдарё ҳам яхши натижа кўрсатмоқда.
Икки йил олдин халқаро фан олимпиадаларида 7 та ҳудуддан 45 нафар ўқувчи соврин олган бўлса, ўтган 6 ойда уларнинг сафига Жиззах, Андижон, Наманган, Самарқанд, Сурхондарё, Хоразм, Тошкент вилоятлари ўқувчилари ҳам қўшилиб, жами 166 та медал қўлга киритилди.
“Бир миллион дастурчи” лойиҳаси доирасида 325 минг ёшлар ўқитилди. Айниқса, Хоразм, Қашқадарё ва Самарқанд ёшлари ITдан катта даромад топишни ўрганиб олди.
Давлат раҳбари ёшларга ҳаётда муносиб ўрин топиши учун зарур шароитлар яратиш асосий вазифага айланганини айтди.
Изоҳ (0)