Apple компанияси букланувчан экранли iPhone устида фаол иш олиб бормоқда. Машҳур таҳлилчи Мин-Чи Kуoнинг сўзларига кўра, яқин ойларда лойиҳага компаниянинг узоқ йиллик ҳамкори Foxcоnn ҳам жалб этилади.
Foxcоnn Apple’га йиғув комплектларини етказиб берувчи йирик ҳамкорлардан бири бўлиб, у лойиҳа устидаги ишларни 2025 йилнинг учинчи чорак охири ёки тўртинчи чоракда бошлаши режалаштирилган. Қурилманинг кўплаб техник жиҳатлари, жумладан, бозор эътиборини тортаётган шарнир механизми ҳали тасдиқланганича йўқ.
Букланадиган iPhone’нинг ишлаб чиқарилиши 2026 йилнинг ёзида бошланиши мумкин. Қурилманинг тақдимоти ва расман савдога чиқиши эса ўша йилнинг кузига мўлжалланган.
Инсайдерлар маълумотига кўра, янги iPhone учун букилувчи дисплейларни Samsung Display компанияси етказиб беради. Буюртманинг умумий сони 15-20 миллион экранни ташкил этади, уларни ишлаб чиқариш бир неча йилга чўзилади. Компания биринчи йилда тахминан 6 миллион дона смартфонни сотишни режалаштирган.
Янги моделдаги iPhone букланган ҳолатда 5,5 дюймли, тўлиқ ёзилган ҳолатда эса 7,8 дюймли экранга эга бўлади. Қурилманинг қалинлиги мос равишда 9,5 мм ва 4,5 мм бўлади. Дисплейдаги буклама чизиғи деярли сезилмайди. Apple бу моделда Face ID ўрнига Touch ID технологиясини жорий этишни режалаштирган. Унинг тахминий нархи 2 000 дан 2 500 долларгача бўлиши кутилмоқда.
Изоҳ (0)