Ҳозирги кунда кўпчилик одамлар уйқудан аввал смартфонидан фойдаланишга одатланиб қолган: кимдир ижтимоий тармоқларга кўз югуртиради, кимдир эса будилник ёки медитация иловаларини ёқиб қўяди. Натижада телефонлар кўпинча ётоқ ёнида ёки ёстиқ остида қолиб кетади. Айниқса, телефон заряд олаётган бўлса, бу ҳолат хавфсизлик жиҳатидан саволлар туғдириши мумкин. Ҳақиқатан ҳам, зарядкада турган телефон билан бирга ухлаш соғлиқ ёки қурилма учун хавфсизми?
Аслида агар асосий эҳтиёт чораларига амал қилинса, зарядкада турган телефон ёнида ухлаш зарарсиз саналади. Замонавий смартфонлар ва заряд қурилмалари ҳаддан ташқари қизиб кетиш ёки ортиқча юкланишга қарши ҳимоя тизими билан жиҳозланган, шунинг учун ёнғин чиқиш хавфи жуда паст, лекин бутунлай йўқ эмас.
Энг кўп учрайдиган хатолардан бири телефонни ёстиқ остига, кўрпа тагига ёки танага яқин жойга қўйишдир. Бу гаджетдаги ортиқча иссиқ ҳароратнинг чиқиб кетишига тўсқинлик қилади. Айниқса, оригинал бўлмаган ёки шикастланган заряд қурилмаси ишлатилганда смартфоннинг қизиб кетиш эҳтимоли ошади. Энг ёмони — уйқуда тасодифан кабелни тортиб юбориш. Кескин ҳаракат натижасида улагич, кабел ёки қурилма шикастланиши, ҳаттоки қисқа туташув юзага келиши мумкин.
Зарядкага қўйилган телефоннинг ёниб кетиш хавфини камайтириш учун қуйидаги оддий қоидаларга риоя қилинг:
- Смартфонни қаттиқ юзали ва очиқ жойда, масалан, стол устида зарядланг.
- Уни ёстиқ ёки кўрпа билан ёпиб қўйманг.
- Фақат сифатли ва сертификатланган заряд қурилмаларидан фойдаланинг.
- Кабелни тасодифан тортиб юборишингиз мумкин бўлган жойлардан узоқроқ тутинг.
- Агар аккумулятор қизий бошласа, шишиб кетса ёки телефон ёмон ишлай бошласа, зарядлашни тўхтатинг ва қурилмани мутахассисга кўрсатинг.
Хулоса: заряд олаётган телефон ёнида ухлаш мумкин, аммо уни иложи борича узоқроқда тутиш лозим. Унинг қизиб кетиши ёки шикастланишига сабаб бўлувчи ҳолатларга йўл қўймаслик тавсия этилади.
Изоҳ (0)