Ҳар йили эътибор марказида бўладиган Apple’нинг янги iPhone тақдимоти бу йил ҳам сентябрь ойида бўлиб ўтади. Доимгидек, тақдимотга яқинлашган сари янги моделлар ҳақидаги миш-мишлар, техник тафсилотлар ва инсайдер маълумотлар интернетда кўпаймоқда. Яқинда пайдо бўлган хабарлардан бири эса кўпчиликни ҳайратга солди, унга кўра, iPhone 17 ва 17 Air моделларининг экран сифати аввалги iPhone’лар даражасига етмаслиги мумкин.
Инсайдер Fixed Focus Digital маълум қилишича, iPhone 17 ва 17 Air моделлари аввалги моделлар билан солиштирганда ёмонроқ экранларга эга бўлади. Манбага кўра, барча моделларда юқори янгиланиш частотасига эга дисплейлар бўлади, бироқ ProMotion технологияси фақат iPhone 17 Pro ва 17 Pro Max версияларига хос бўлиб қолади. Флагман версиялар илғор LTPО OLED экранлар билан жиҳозланади, iPhone 17 ва 17 Air эса LTPS технологиясидаги OLED дисплейга эга бўлади.
Бундай экранлар 1 дан 120 Гц гача бўлган динамик частота ўзгаришини қўллаб-қувватламайди. Бу эса базавий моделлар батареяни кўпрoқ сарфлаши ва экранлар кўрсатилаётган контентга мос равишда янгиланиш частотасини автоматик ўзгартира олмаслигини англатади. Масалан, агар 24 кадр/с да фильм ёқилса, дисплей 30, 60 ёки 120 Гц частотада янгиланади. Бироқ Pro версияларда тасвир айнан 24 Гц да намойиш қилинади.
ProMotion технологияси Apple флагман смартфонларида илк бор 2021 йилдаги iPhone 13 Pro моделида қўлланилган эди. Шундай қилиб, бу жиҳатдан янги моделларнинг экран сифати ҳатто эски iPhone’лардан ҳам паст бўлади.
Изоҳ (0)