Смартфон ҳаётимизнинг ажралмас қисмига айланган. Унда деярли барча керакли маълумотлар сақланади. Аммо энг ноқулай пайтда хотира тўлиб қолиши кўпчиликка таниш ҳолат. Кўп ҳолларда эса сурат ва видеоларни ўчиришга кўнглимиз бўлмайди. Бундай вазиятларда хотирани бўшатишнинг ишончли ва хавфсиз усулларини қўллашга тўғри келади.
Иловалар ва браузерларнинг кешини тозаланг
Иловалар ҳамда интернет браузерлар вақт ўтиши билан жуда кўп керакcиз маълумотларни йиғиб боради. Уларни тозалаш эса телефон тезлигини оширади ва хотирани бўшатади. Энг муҳими бу жараён телефонингиздаги муҳим файлларга таъсир қилмайди.
Такрорий файллар ва юклаб олинган ҳужжатларни ўчириб ташланг
Баъзида бир хил файлни бир неча бор юклаб олганингизни сезмай қолишингиз мумкин. Бундай дубликатларни аниқлаб, йўқотиш орқали анчагина бўш жой очилади. Буни қурилма созламалари орқали осон топиш мумкин.
“Ўчирилган” файллар папкасини унутманг
Кўп файллар ўчирилди деб ҳисобласак-да, улар телефонингиз “сават” ёки “ўчирилган” бўлимида сақланиб қолади. Бу ерда телефондан ўчирилган файллар автоматик равишда маълум муддат сақланади, аммо улар хотирадан жой олиб туради. Вақти-вақти билан бу бўлимни тозалаб туринг.
Фойдаланилмайдиган иловалардан халос бўлинг
Кўплаб иловаларни “керак бўлиб қолар” деб ўрнатамиз, лекин уларга деярли кирмаймиз. Айниқса, ўйинлар ёки саёҳат вақтида юклаб олинган фильмлар телефон хотирасида анчагина жой эгаллайди.
Автоматик тозалаш функциясидан фойдаланинг
Ҳеч нима сизнинг рухсатингизсиз ўчиб кетмайди. Шунчаки iPhone’даги “Хотирани бошқариш” ёки Android’даги “Телефон диспетчери”га киринг ва дастур керакcиз файлларни ўзи йиғиб беради. Фойдали файлларни ўчириб юбормаслик учун уларни текшириб чиқинг, кейин эса тасдиқланг.
Изоҳ (0)