Хитойнинг Xiaomi компанияси янги лойиҳа — Xiaomi Youth Apartmentʼни тақдим этди. Бу арзон нархдаги хонадонлар компанияда ишлашни хоҳловчи талабалар учун мўлжалланган. Лойиҳанинг асосий мақсади ёш битирувчиларни қўллаб-қувватлаш ва уларга Xiaomi офисларига яқин жойда қулай турар жой тақдим этишдир.
Ҳозирча Xiaomi иккита турар жой мажмуаси қурди. Улардан бири Пекинда жойлашган бўлиб, 7 та бинодан ва 2658 та 29 метр квадрат майдондаги студиялардан иборат. Ҳар бир хонадонда алоҳида ҳаммом мавжуд, мебеллар тўлиқ таъминланган.
Ётоқхоналар Xiaomiʼнинг илғор технологиялари: “ақлли” чойнак, ёруғлик мосламалари, овозли ёрдамчилар ва ҳатто автоматик парда тизимигача жиҳозланган. Шунингдек, бинонинг биринчи қаватида спорт зал, коворкинг майдони, кичик ресторан ва боғга чиқиш эшиги бўлган умумий ҳудуд ташкил этилган.
29 июндан бошлаб Xiaomi 2025 йил битирувчилари учун Пекин комплексига жойлашиш учун аризаларни қабул қила бошлади. Ёз давомида танлов 2022–2024 йил битирувчилари учун ҳам очилади. Ижаранинг ойлик қиймати 1999 юан (тахминан 280 доллар). Бундай квартирада яшаш учун битирувчи кейинчалик Xiaomiʼда ишлаши керак.
Мажмуа Xiaomiʼнинг бош технологик паркидан 10 километр ва Xiaomi Smart саноат ҳудудидан 3 км узоқликда жойлашган. Компания ходимларга доимий автобуслар, 24 соатлик навбатчи ёрдам хизмати ва кўчиш пайтида юк ташиш каби қулайликларни ваъда қилган.
Иккинчи турар жой мажмуаси эса Нанкин шаҳрида жойлашган бўлиб, 55 метр квадрат майдонга эга 566 та икки хонали квартиралардан иборат. Бу бино Xiaomi Nanjing Тech Park кампусидан атиги 100 метр узоқликда. Пекиндагидан фарқли ўлароқ, бу ердаги хонадонлар барча амалдаги Xiaomi ходимларига тақдим этилади.
Xiaomi асосчиси Лей Цзюннинг айтишича, бу уйлар компания муҳандисларининг турмуш сифатини яхшилаш учун қурилган.
Изоҳ (0)