Коллаген — инсон организмида энг кўп тарқалган оқсил бўлиб, у тери, суяклар, мушак ва боғловчи тўқималарнинг асосидир. Испан олимлари коллаген қўшимчалари тана массасини камайтиришга ёрдам берадими, деган саволга жавоб топиш учун тадқиқот ўтказди.
Эксперимент иштирокчилари 12 ҳафта давомида кунига икки марта коллаген билан бойитилган оқсилли батончикларни истеъмол қилди.
Батончик таркибидаги коллаген махсус ишлов берилган бўлиб, у ошқозонда кенгайиб, сувни ушлаб туришга ёрдам беради ва шу тариқа тўқлик ҳиссини кучайтиради. Ҳар бир батончикда 10 грамм коллаген, жами 90 калория, деярли 9 грамм оқсил, 7 граммдан ортиқ углевод, 3,2 грамм ёғ ва 2,5 грамм тўқима толалари мавжуд эди. Коллагендан ташқари, батончик таркибида қора шоколад, озиқ-овқат толалари, сироп, соя оқсили ва кунгабоқар ёғи ҳам бор эди.
Экспериментда 20 дан 65 ёшгача бўлган ортиқча вазнга эга 64 киши иштирок этди. Бир гуруҳга батончикларни кунига икки марта — тушлик ва кечки овқатдан 45 дақиқа олдин, бир стакан сув билан ейиш таклиф қилинди. Иккинчи гуруҳ эса шу вақт ичида фақат сув ичди. Орадан 12 ҳафта ўтгач, коллагенли батончикларни истеъмол қилган иштирокчилар ўртача 3 кг вазн йўқотишган. Иккинчи гуруҳ эса тахминан 1,5 килога озишни қайд этган.
Бундан ташқари, биринчи гуруҳдаги иштирокчиларда қон босими пасайди ва жигар фаолияти кўрсаткичлари яхшиланди. Энг муҳими, вазн йўқотиш мушак массасини йўқотмасдан амалга ошди — бу ҳолат кўпинча озишда учрайди.
Олимлар тўқлик ҳиссини коллагеннинг ошқозонда ҳажмини ошириш қобилияти билан боғлиқлигини тахмин қилишади. Бундан ташқари, коллаген ичак микробиотасининг таркибига ижобий таъсир кўрсатиши мумкин. У ошқозон-ичак тизимининг юқори бўлимларида ёмон сўрилади ва қалин ичакка етиб боргач, фойдали бактериялар учун озуқа бўлиб хизмат қилади. Натижада организмдаги яллиғланиш даражасини камайтирувчи қисқа занжирли ёғ кислоталари ҳосил бўлади. Бундан ташқари, коллаген бошқа оқсилларга нисбатан одатда ҳазм қилиш учун кўпроқ энергия талаб қилади.
Қизиқарли натижаларга қарамай, тадқиқотнинг чекловларини ҳам инобатга олиш лозим. Иштирокчилар сонининг камлиги ва кузатув муддати қисқалиги (бор-йўғи 12 ҳафта) коллагеннинг тана вазнига таъсири ҳақида аниқ хулоса чиқаришга имкон бермайди. Бундан ташқари, батончиклар таркибида фақат коллаген эмас, балки клетчатка, оқсил, шакар ўрнини босувчи моддалар ва бошқа фойдали элементлар ҳам бўлган. Эҳтимол, вазн йўқотиш айнан шу моддалар комбинацияси туфайли юзага келган бўлиши мумкин.
Мутахассислар фикрича, синовдан ўтган ҳамда рецепт бўйича қабул қилинадиган коллаген безарар.
Семизлик — мураккаб касаллик бўлиб, у комплекс ёндашувни талаб қилади. Коллагенни вазн йўқотиш стратегиясига киритишдан олдин шифокор ёки диетолог билан маслаҳатлашиш тавсия этилади.
Изоҳ (0)