Ёз келиши билан терлаш муаммоси кўпчиликни безовта қила бошлайди. Бу табиий жараённи тўхтатишнинг иложи йўқ, аммо назорат қилиш мумкин. Буни қандай амалга оширишнинг оддий усуллари ҳақида сўз юритамиз.
Атроф-муҳит ҳарорати ўртача 20 дан 24 даражагача бўлганда организм ўзини қулай ҳис қилади. Ҳарорат кўтарилиши билан тананинг иссиқлик чиқариши ҳам юқорига кўтарилади ва биз терлай бошлаймиз. Табиатга таъсир қилишнинг иложи йўқлиги сабабли биз фақат гўзаллик чораларини қўллашга ҳаракат қилишимиз мумкин.
Антиперспирантни тўғри суртинг
Биринчи ва асосий қоида — антиперспирант ёки дезодорантни фақат тоза терига, масалан, эрталабки душдан сўнг дарҳол суртинг. Агар сиз аллақачон терлаган бўлсангиз, антиперспирантдан фойдаланиш вазиятни фақат ёмонлаштиради, тер ҳиди хушбўйлантиргич билан биргаликда унчалик ёқимли бўлмаган бирикма ҳидини беради. Агар вазият кескин бўлса, ванна қабул қилиш имкониятини топиш керак — аммо антиперспирантни терига қайта-қайта суртмаслик керак.
Тўғри овқатланинг
Аччиқ, шўр ва ширин таомлар кўп терлашни келтириб чиқаришини билармидингиз? Масалан, оддий қора мурч таркибидаги капсаицин моддаси организмда ачишиш ҳиссини уйғотади. Тана эса бунга дарҳол жавоб беради, таъсирни иложи борича тезроқ зарарсизлантиришга ҳаракат қилади ва бунинг учун кўпроқ сув талаб қилади — ўз навбатида, тер янада кўпроқ ажралади.
Ширин ва шўр нарсалар ҳам ташналикни келтириб чиқаради, бу эса терни бир неча баробар кўпроқ чиқаради. Айтганча, чанқоқни ҳам тўғри қондириш керак: оддий сув ичинг ва ширин газли ичимликлар, шарбатлар ва энергетиклардан воз кечинг.
Енгил кийим кийинг
Синтетик кийимларни, ҳатто улар тренднинг чўққисида бўлса ҳам, бир четга суриб қўйинг — иссиқ кунларда пахта ва зиғир толали кийимларни танлаган маъқул. Ушбу табиий матолар ҳавони яхши ўтказади ва терига “нафас олиш” имконини беради. Рангга ҳам эътибор беринг: эсда тутингки, оч ранглар қуёшни акс эттиради, тўқ ранглар эса ютади, шунинг учун “буғланишни” истамасангиз, барча тўқ рангли моделларни салқинроқ ҳавога қолдиринг. Шунингдек, ёрқин бир хил рангдаги кийимларга эҳтиёткорлик билан муносабатда бўлинг — унда нам доғлар, айниқса, яққол кўринади.
Яширин ҳийлалардан фойдаланинг
Агар кийимдаги нам доғлар сизни безовта қилса, қўлтиқ учун махсус қистирмалар сотиб олинг. Улар кийимда излар пайдо бўлишининг олдини олади ва нейтрал тана рангида бўлгани сабабли умуман сезилмайди. Баъзи қистирмаларни матога, баъзиларини эса тўғридан тўғри қўлтиқ терисига ёпиштириш мумкин. Бир марталик ва қайта ишлатиладиган қурилмалар ҳам мавжуд. Гўзаллик саноати ютуқларидан фойдаланинг ва комплексларингиздан халос бўлинг!
Ўзингиз билан антиперспирант салфеткаларни олиб юринг
Бу кун давомида душ қабул қилиш имкониятига эга бўлмаганлар учун ҳақиқий нажотдир, ташқи кўриниш ва ўзини тетик ҳис қилиш эса шунчаки зарурдир. Махсус таркибий қисмларга эга салфеткаларни тананинг муаммоли қисмларида ишлатиш осон ва сумкада олиб юриш қулай. Бир неча сония — ва сиз енгил ёқимли ҳидни ҳис қиласиз ва йўқотилган тароватни қайта топасиз.
Изоҳ (0)