Бел соҳасидаги оғриқ, айниқса эгилиш ёки оғир юк кўтариш пайтида сезиладиган ноқулайлик умуртқалар орасидаги чурранинг ривожланаётганидан далолат бериши мумкин. Бу ҳолатнинг яна бир белгиси — белда таранглик ҳисси ва қотиб қолишидир, дея тушунтирди остеопат Дмитрий Симкин “Газета.Ру” нашрига берган интервьюсида.
Бел соҳадаги оғриқ фақат тўсатдан юзага келадиган жисмоний зўриқиш пайтида эмас, балки узоқ вақт бир ҳолатда туриш натижасида ҳам пайдо бўлади. Айнан шу сабабли ҳайдовчилар кўпинча белдаги оғриқдан шикоят қилишади, чунки улар кўп вақтини ўтирган ҳолатда ўтказади.
Баъзида чурра ҳеч қандай ташқи аломат бермаслиги ҳам мумкин. Бу пайтда у ҳали кичик бўлади ёки умуртқага яқин соҳадаги нерв толаларини сиқмаётган бўлади. Шунингдек, чурра ҳосил бўлишидан олдинги босқич — протрузия вақтида ҳам касаллик белгилари сезилмайди. Чунки бу пайтда дисклар оралиғи чўзилган бўлади, бироқ унинг ички қисмидаги желесимон моддаси ташқарига кўп чиқмаган бўлади.
Мутахассиснинг айтишича, чурра оғриғи тўсатдан: оддий эгилиш ёки кескин ҳаракат пайтида кучайиши мумкин. Бундай ҳолатда биринчи навбатда оғриқни камайтиришга эътибор қаратиш керак. Дори воситаларини фақат шифокор невропатолог белгилайди. Одатда даволаш оғриқ қолдирувчи воситалар ҳамда B гуруҳи витаминларини қабул қилишни ўз ичига олади.
Бундан ташқари, умуртқага дам бериш зарур: кўпроқ ётган ҳолатда бўлиш, белга юклама бермаслик керак. Оғриқ кучайганида ўтириш тавсия этилмайди. Юриш мумкин ва ҳаттоки фойдали, лекин қадам босишда белни қўллаб-қувватлайдиган махсус корсет тақиб юрган ҳолда бўлиш керак.
Агар бемор юришга қийналса, тўрт оёқлаб ҳаракат қилишга ҳам рухсат берилади. Энг муҳими, тана ҳолатини тез-тез ўзгартириб туришдир. Масалан, бир оз вақт ётиш, бир оз ҳаракат қилиш ва яна бир оз вақт тўрт оёқлаб юриш ва ҳоказо. Бу бел соҳасида қон айланишни яхшилайди ва шиш кучайишининг олдини олади.
Оғриқ чекингач, эътиборни даволаш ва олдини олиш чораларига қаратиш муҳим. Бунга даволовчи жисмоний машқлар, игнатерапия, физиотерапия муолажалари ҳамда остеопатик ёрдам киради. Профилактика учун эса қулай ва эргономик иш жойини ташкил этиш, жисмоний зўриқишни тўғри тақсимлаш муҳим. Бел соҳасини қўллаб-қувватловчи корсет ҳам юкламани камайтиришга ёрдам беради.
Изоҳ (0)