Август учун қанча фуқарога пенсия ва нафақа тўлангани маълум қилинди

Жорий йил август ойи учун пенсия ва нафақа тўловлари банкларга тўлиқ ўтказиб берилди. Бу ҳақда Пенсия жамғармаси ва Ижтимоий ҳимоя миллий агентлиги хабар берди.

Маълум қилинишича, жорий ой учун Ўзбекистондаги жами 721 минг фуқарога 721,3 миллиард сўм нафақа пуллари тўланган. Шундан 602,2 минг киши (82,8 фоиз) нафақасини нақд пулсиз шаклда, банк карталарига қабул қилиб олган.

“Амалдаги қонунчилик талабларига мувофиқ, нафақа пулларини нақд шаклда олувчиларга жорий ой тўловлари Халқ банкининг сайёр кассалари томонидан етказиб берилаётганини маълум қиламиз”, дейилади Ижтимоий ҳимоя миллий агентлиги хабарида.

Шу билан бирга, август ойи учун пенсия тўловлари ҳам нақдсиз шаклда олувчиларга тўлиқ тўлангани хабар қилинган.

“Пенсия жамғармаси томонидан тўлов рўйхатларига киритилган 4,2 миллион нафар пенсия олувчилар учун талаб этилган маблағлар тижорат банкларига молиялаштирилиб берилди”, дейилади манбада.

Қайд этилишича, пенсионерларнинг 3,6 миллион нафари (85 фоиз) тўловларни нақд пулсиз шаклда қабул қилмоқда. Нақд пуллар эса тасдиқланган графикларга асосан етказиб берилиши билдирилган. Бироқ умумий тўлов миқдори очиқланмаган. Лекин масалан, май ойи учун 4,1 миллион нафар пенсионерга жами 6 триллион 57 миллиард сўм тўлаб берилганди.

Аввалроқ маълум қилинганидек, Пенсия жамғармаси рўйхати мамлакатдаги жами пенсионерлар сонини ифодаламайди. Ўзбекистонда ҳуқуқни муҳофаза қилувчи органлар тузилмаларидан пенсияга чиққанлар ҳисоби ва тўловлари алоҳида юритилади. Ва уларнинг сони ва қанча пенсия олаётгани ёпиқ маълумот сифатида қаралади.

Сўнги йилларда давлат бюджетидан ижтимоий нафақалар, моддий ёрдам ва компенсациялар учун тўловлар камайиб бормоқда. Масалан, мазкур йўналишга 2025 йил I ярмида 6,5 триллион сўм ажратилди. Таққослаш учун, 2024 йил мос даврида бу мақсадга 8 триллион сўм йўналтирилган.

Жорий йилда нафақалар, моддий ёрдам ва аҳолига бошқа имтиёзли тўловлар учун 17,4 триллион сўм ажратилиши кутилмоқда. 2026 йилда бу рақам қарийб 900 миллиард сўмга қисқартирилиб, жами 16,5 триллион сўм тўланади.

2023 йил ноябрда эълон қилинган 2024—2026 йилларга мўлжалланган Бюджетномада юқоридагидан фарқли кутилмалар берилганди. Яъни 2025 йилда нафақалар, моддий ёрдам ва компенсация тўловлари учун бюджетдан 22,2 триллион сўм, 2026 йилга бориб эса 24 триллион сўм тўланиши кўзда тутилган.