Сўнгги вақтларда рақамли технологияларни қўллаган ҳолда содир этилаётган фирибгарлик ҳолатлари тўғрисида фуқароларнинг хабардорлиги ошганлиги сабабли эндиликда фирибгарлар мураккаброқ схемалардан фойдаланмоқда. Бу ҳақда Марказий банк матбуот хизмати хабар берди.
Хусусан, ўзини уяли алоқа оператори ходими сифатида таништирувчи фирибгар фуқарога қўнғироқ қилиб, телефон рақамидан фойдаланиш бўйича шартномани узайтириш борасида бир қанча саволлар беради.
Бир оз вақт ўтгач, фирибгарлар фуқарога Telegram орқали Марказий банк рамзий белгилари акс эттирилган профилдан хабар юбориб, унинг банк ва тўлов ташкилотлари мобил иловаларидаги шахсий кабинетларига бегоналар рухсатсиз киришга уринганлиги, шунингдек, кредит амалиётини якунлаш (ёпиш) жараёни ниҳоясига етмаганлигини маълум қилади.
Бундан ташқари, агар фуқаро ҳамкорлик қилишдан бош тортса ёки Марказий банкнинг сохта ходими кўрсатмаларини бажармаса, унга нисбатан жиноий жавобгарликка тортиш чораси кўрилиши билан таҳдид қилинади. Дўқ-пўписалар янада ишончли бўлиши учун юборилаётган хабарларга топиш осон бўлган очиқ манбалардан Жиноий-процессуал кодекснинг электрон файли ҳам бириктириб қўйилади.
Агарда фуқаро фирибгарларнинг ёлғон гапларига ишониб, улар айтган кўрсатмаларни бажарса, банк картасидаги маблағлардан айрилиб қолиши мумкин.
Шу муносабат билан Марказий банк фуқароларни огоҳликка чақирди. МБ бу каби хабарларга ҳеч қандай алоқаси йўқлигини маълум қилиб, фуқароларга бу каби хабарларга ишонмасликни тавсия қилди.
Ўзбекистонда сўнгги беш йилликда кибержиноятлар 68 баравар ошгани ҳақида хабар берилганди.
Кибержиноятлар — бу ахборот технологиялари, компьютер тизимлари, тармоқлар ёки интернетдан фойдаланган ҳолда содир этиладиган ҳуқуқбузарликлар ва жиноятлардир.
Марказий банкнинг Киберхавфсизлик маркази бошлиғи ўринбосари Даврон Абдуллаев “Дарё” мухбирига берган интервьюсида Ўзбекистондаги асосий кибер фирибгарликлар хориждан туриб содир этилаётганини маълум қилганди. У кибержиноятлар ортишига асосий сабаблардан бири аҳолида молиявий саводхонлик етишмаётгани билан боғлиқлигини айтганди.
2024 йил I чорагида Ўзбекистонда 2-3 мингтагача киберфирибгарлик жиноятлари содир этилгани хабар қилинганди. 2023 йилнинг январь–ноябрь ойларида эса 5 минг 500 та кибержиноят содир этилган. Шундан 70 фоизи банк карталари билан боғлиқ фирибгарлик ва ўғрилик жиноятлари ҳисобланади.
Изоҳ (0)