Neuralink инновацион мия импланти ва сунъий интеллект туфайли фалаж бемор Бред Смит мулоқот қилиш имконига эга бўлди. Бу ҳақда Fox News хабар берди.
У амиотрофик латерал склероз касалига дучор бўлган. Ҳасталик ҳаракатни бошқарувчи нерв ҳужайраларига зарар етказади. оқибатда одам аста-секин ҳаракат қила олмай қолади.
Neuralink импланти ўрнатилишидан олдин, бемор мулоқот қилиш учун кўзни кузатиш технологиясидан фойдаланган. Аммо унда бир қанча муаммолар қайд этилган.
“Бу техника мўжизаси эди. Технология қоронғи хонада яхши ишлаши сабабли асосан қоронғида ётар эдим, гўёки Бетменга ўхшаб. Ёруғ муҳит тизимни ишдан чиқарарди, бу эса мулоқотни секинлаштирар ва баъзан имконсиз қилиб қўярди. Neuralink менга ёруғ оламга чиқишга ёрдам берди”, деди Смит ўзининг Х тармоғида.
Смит дунё бўйлаб Neuralink мия-компьютер интерфейсини ўрнатган учинчи шахсдир. Тахминан бешта танга қалинлигидаги қурилма унинг бош суягида жойлашган. У нейронлардан сигналларни қабул қилиб, уларни симсиз равишда беморнинг компьютерига узатади. Кейин компьютер бу сигналларни анализ қилиб, Смитга курсорни экранда ўз фикрлари билан ҳаракатлантириш имконини беради.
“Миямга ўрнатилган Neuralink импланти ҳар 15 миллисекундда нейронларни ишга туширадиган 1024 та электродни ўз ичига олади ва жуда кўп маълумотларни яратади. Neuralink менинг фикр ёки ўйларимни ўқимайди. Компьютеримда сунъий интеллект ушбу маълумотларни реал вақт режимида акс эттиради”, дейди Смит.
Neuralink Смитга оиласи ва дунё билан мулоқот қилишнинг янги усулларини тақдим этган. Энди у болалари билан ўйинлар ўйнаб, аввалгидан тезроқ мулоқот қила олади. Мулоқотни янада тезлаштириш учун Смит миллиардер Илон Маскнинг сунъий интеллект чатботи — Grok’дан фойдаланади. У беморга жавоб ёзишда ёрдам беради.
Изоҳ (0)