“Дарё” “Хориждаги ўзбекистонликлар” лойиҳаси доирасида хорижда ўқиётган, меҳнат фаолиятини олиб бораётган юртдошларимизнинг ҳаётини ёритишда давом этади. Лойиҳанинг бу галги қаҳрамони — АҚШдаги Интерлочен Arts Academy ва Нью-Йоркдаги консерваторияда таҳсил олган, ҳозирда ўз шогирдларига фортепианодан сабоқ бераётган кўплаб халқаро мусиқий танловлар ғолибаси Мафтуна Толипова.
Мафтуна Толипова Тошкент шаҳрида туғилган. Ҳозирда АҚШнинг Нью-Йорк штатида истиқомат қилади. У ижодий фаолияти давомида кўплаб нуфузли халқаро танловларда иштирок этган. Мафтуна Толипова 5 ёшидан Тошкент шаҳрида жойлашган Успенский мактабида таҳсил олган. Ҳозирда Ню-ёркдаги Cарнегиэ Ҳалл концерт саройида фаолият юритиб, шогирдларига мусиқий таълим бермоқда.
“Мен оила аъзоларимдан, ота-боболарим ва бувиларимдан жуда фахрланаман”
Менинг исмим Мафтуна Толипова, Тошкент шаҳрида туғилиб ўсганман. Зиёлилар оиласиданман. Оиламиз катта эмас. Оила аъзоларим иқтисодиёт, илм-фан, таълим, қурилиш, бизнес, санъат ва маданият соҳаларида танилган инсонлар. Мен оила аъзоларимдан, ота-боболарим ва бувиларимдан жуда фахрланаман. Оилада 3 та қизмиз. Мен кенжатой қиз ва эркатой набираман. Бизни тарбия қилишда буваларим билан бувиларимнинг ҳиссалари катта, ота-онам ишда бўлишгани сабабли болалигимиз улар билан ўтган. Улар бизга илм ва меҳнатга муҳаббатни, жамиятга фойда келтиришни уқтирган, мустақил, креатив фикрлашга ўргатган.
Болалик хотираларим бувим билан боғлиқ
Болалигимдаги энг яхши хотираларим оиламиз билан, айниқса, бувим билан боғлиқ. Улар жудаям олийжаноб инсон бўлган. Ҳамма жойда – оилада, ишда, маҳаллада, мактабимда ҳам ҳурматлари жудаям баланд бўлган. Кўпчилик бизнинг уйга улардан маслаҳат олгани ва суҳбатлашгани келарди. Бувим ҳафтада икки марта: пайшанба ва якшаба кунлари ҳамма яқин қариндошларни йиғиб ош қиларди. Ҳаммамиз, катта-ю кичик оила даврасида йиғилиб охирги янгиликлар билан бўлишардик. Ҳозир эсласам шу оила йиғинларида эсда қолган хотираларимдан ва ўрганган нарсаларимдан жуда хурсанд бўламан. Энг яхши кўрган таомим ош бўлиб қолган. Чунки бу таом менга бахтли болалик хотираларимни эслатади.
Мусиқага қизиқиш болалигимда пайдо бўлган
Менда мусиқага ва санъатга қизиқиш болалигимдан пайдо бўлган. Бунга, менимча, оиламиздаги ижодий ва яратувчилик муҳити сабаб бўлган бўлса керак. Мусиқага қизиқишимни кўрган оила аъзоларим ёшлигимдан қўллаб-қувватлашган, айниқса, бувам қобилиятимга қаттиқ ишонган ва ҳозирги кунгача ҳам ҳамма қилаётган ишларимга кўмаклашади. Болалигимда опаларим ҳар хил мусиқа асбобларида классик ва миллий куйларни чалишар эди. Мен бундан жуда таъсирланиб, уларга ўхшаб чалишни жуда ҳам хоҳлардим. Шу сабабли 5 ёшимдан бошлаб Успенский номидаги республика ихтисослаштирилган мусиқа академик лицейида таҳсил олишни бошлаганман. Менинг устозларим — Жаннат Сабитовна ва Гулнора Хуршидовна, улар юқори даражадаги мусиқашунос ва яхши инсон бўлган. Улар менда санъат ва мусиқага бир умрлик меҳримни шакллантирган, шу сабабли улардан жудаям миннатдорман.
“Фестиваль ташкилотчиларидан олган жавоб хатим ҳаётимдаги муҳим ўзгаришлардан бири бўлган”
Оиламиз жуда ҳам меҳмондўст, шу туфайли уйимизга кўп меҳмонлар келарди, уларнинг орасида чет эллик меҳмонлар ҳам бўлар эди. Уйдагилар уларга бизнинг бой тарихимизни, ўзбек маданияти ва урф-одатларини гапириб, таомларимиз билан меҳмон қилишарди. Мен уларга фортепианода ўзбек мусиқаларидан ижро этиб берардим. Бир куни уйимизга АҚШдан меҳмонлар келганда, улардан бир аёл: “Мафтунанинг ўзгача истеъдоди бор, ёзда юртимизда нуфузли санъат фестивали бўлиб ўтади. Бу фестиваль мусиқа соҳасида ҳам таълим олишга янги имкониятлар яратиб беради. Қатнашиш имтиҳонига топшириб кўринглар”, деб маслаҳат берди. Мен ўша пайтда саккизинчи синфни битираётгандим, инглиз тилида ҳали яхши гаплашмас эдим, бироқ бу фестивалга жуда қизиқиб қолгандим.
Фестиваль ҳақида ҳамма маълумотларни ижтимоий тармоқлар орқали билиб, уйдагиларга бориш истагини билдирдим. Улар мени қўллаб, ижро қилган мусиқаларимни видео шаклида ёзиб, фестиваль ҳайъатига жўнатишга ёрдам берди. Мен танлов жавобини интизорлик билан кутганман. Олган жавоб хатим ҳаётимдаги муҳим ўзгаришлардан бири бўлган. Хатда менга фестивалга таклифнома билан қатнашиш харажатларини қоплайдиган грант маблағи тақдим қилинган эди. Оила аъзоларимнинг кўмагида ойим билан биргаликда 2012 йилнинг ёзги таътилида АҚШга борганмиз. Ўша ёз менинг мусиқа ва санъатдаги дунойқарашимни ҳар тарафлама бойитди ва менга янги имкониятларни яратди. Фестивальда қатнашган АҚШдаги нуфузли мусиқа академияси менга ўқишимни шу ерда давом эттиришни таклиф қилди. Ўша вақтда ҳали чет элда ўзим яшаб ўқишга тайёр эмас эдим.
Тошкентга қайтиб, инглиз тилини яхшироқ ўргана бошладим
Тошкентга қайтганимдан кейин инглиз тилини ва бошқа фанларни инглиз тилида тушунишга, мукаммал ўрганишга киришдим. Икки йилдан сўнг АҚШдаги Интерлочен Arts Academyъга кириб, ўқишимни давом эттирдим. Бу академияни тугатгач, Маннес School оф Music, Нью-Йоркдаги консерваторияда билим олиб, 2022 йилда Мусиқа магистри унвонига сазовор бўлдим.
Консерваторияда ўқиётган вақтимда иш фаолиятимни бошлашга рухсат берилган эди. Мен бу имкониятдан фойдаланиб, тажрибамни санъат ва таълим соҳасида бойитдим. Кўп концертларда қатнашиб, классик ва ўзбек мусиқа асарларини ижро этдим ҳамда мусиқа фанидан ва фортепианодан дарс бердим. Ўқувчиларим кўп, улар орасида ёши катталари ҳам, жуда кичик болалар ҳам бор. Мен уларнинг қобилиятларига қараб ўқув дастурини тайёрлайман, улардаги мусиқа ва санъатга бўлган қизиқишни бойитиб, ижро маҳоратини яхшилашга ҳаракат қиламан.
Олаётган билимларим билан Ўзбекистон ривожига ҳисса қўшмоқчиман
Ҳозирда Ню-ёркдаги Cарнегиэ Ҳалл концерт саройида ишлайман. Асосий мақсадим таниқли санъат ва мусиқа арбоблар билан мулоқатда бўлиб, иш ўрганиш ва малакамни ошириш. Хусусан, мен ўқувчиларни тажрибали ва истеъдодли мусиқий жамоалар билан боғлаб, уларга муҳим мусиқий кўникмаларни шакллантириш имконини берувчи дастурни амалга оширишга ёрдам бериб келяпман.
Оиламдан ва Тошкентимдан узоқда бўлсам ҳам, амалда бу йироқликни сезмайман. Ҳозирги кунда ривожланган ахборот технологиялари туфайли мен оила аъзоларим, қариндошларим ва Тошкентдаги дўстлар билан яқин алоқадаман. Уйдагилар билан ҳар куни мулоқот қиламан, Тошкентга ҳам тез-тез бориб тураман, оиламиздаги катта тадбирларнинг ҳаммасида иштирок этаман, қариндошларим ва танишлар ҳам Нью-Йоркка келса, албатта, учрашамиз. Шунинг учун бўлса керак, кучли соғинч ҳиссиётлари менда кам бўлади.
Ҳозирги кунда мусиқий таълим соҳасида тажрибамни оширяпман, янги таълим услубларини ўрганиб, янги изланишлар устида ишлаяпман. Келажакда орттирган тажриба, билимларимни ҳамда халқаро мутахассислар билан ҳамкорликларимни Ўзбекистонда қўллаш ниятим бор, шунинг учун ҳам Тошкентда опаларим билан инновацион бизнесга қўл урганмиз. Ишонаманки, халқаро билимим ва тажрибам ватанимнинг келажак авлодлари ривожланишига кўмак бўлади.
Кўп мамлакатларга концерт бергани борганман, Филиппин, Украина, Малайзия, Хитой ва Италияда бўлганман. Ҳар битта мамлакатнинг ўз тарихи ва маданияти бор. Мен уларни ўрганиб тушунишга ҳаракат қиламан, сабаби бу жуда қизиқ. Ўқувчиларим ҳар хил миллат вакиллари, уларнинг урф-одатларини ва маданиятини тушуниш, мулоқот қилиш яхши ишлашга ёрдам беради. Албатта, ҳар бир мамлакатларнинг турли хил таомларини татиб кўриш, билиш жуда қизиқарли.
Аёллар албатта илмли бўлишлари керак
Ҳар бир аёл бахтга сазовор, чунки аёл бахтли бўлса жамият ҳам бахтли бўлади. Бироқ бахтни ҳар ким ҳар хил тушунади. Аёл тўлиқ бахтли эканини ҳис қилиши учун илмли бўлиши керак, бир хил шароитларда аёллар бор бахтининг қадрига етмайди. Ўйлайманки, агар аёл ўзи учун бахт нималигини тушуниб шу бахтни қуришга ҳаракат қилса, унинг жамиятдаги ўрни ҳам ижобий бўлади. Бу масалада санъат ва мусиқа соҳасидаги аёлларни кўп ўйлайман.
Чунки бу соҳада ривожланиб ишлаш осон эмас, кўп аёлларимиз соҳадаги олий маълумотни қўлга киритганидан кейин аёлларга мос иш топиш имкониятлари билан чекланади. Менинг бизнес режаларим аёлларимизга кўпроқ имкониятлар яратиб, ривожланишида ва оила билан жамиятга фойда келтиришда эшик очади. Чунки аёл ва санъат бир-бирига боғлиқ нарса, булар инсон маданиятини ва дунёқарашини ҳар жиҳатдан ижобий тарафга ўзгартиради. Бу ўзгаришларни аёллар қилса, самараси каттароқ бўлишига ишонаман.
.jpg)
Санъат ва таълим соҳасида ютуқларим бор, бироқ катта муваффақиятларим ҳали олдинда. Ёшлигимдан илм ва тажриба инсонни муваффақиятга элтувчи омил эканлигига ўргатишган, мен буни ўзимнинг ҳаётимдан ҳам биламан. Шунинг учун ишончим комилки, изланишларим ва бошлаган лойиҳаларим келажакдаги ютуқларга эришишимга ёрдам беради. Тенгдошларим ва ёшларга тавсиям ҳар қандай имкониятдан фойдаланинг, бошқаларга ҳам имконият яратишга ҳаракат қилинг.
Изоҳ (0)