“Ипак ва зираворлар” халқаро фестивали йиллар давомида нафақат Бухоро, балки Ўзбекистон маданий ҳаётида муҳим воқеага айланди. Аввалига маҳаллий даражада бошланган, сўнг халқаро майдонга чиқиб, бугунги кунда туризм брендига айланган ушбу фестивал тарихий шаҳар Бухоро руҳини тўлақонли намоён этади.
Жорий йилнинг 6–8 июнь кунлари бўлиб ўтган XXI “Ипак ва зираворлар” фестивали Туризм қўмитаси, Бухоро вилояти ва шаҳри ҳокимликлари, “Ҳунарманд” уюшмаси ва бошқа ташкилотлар ҳамкорлигида ташкил этилди. Бу йилги тадбир нафақат анъанавий руҳда, балки янада замонавий форматда, ташкил этилди.
XXI бор ташкил этилган “Ипак ва зираворлар” халқаро фестивали ўзининг кўлами, мазмуни ва ташкилотчилик даражаси билан ўтган йилларидаги фестиваллардан ажралиб турди. Аввалги йилларда иштирокчилар сони бир неча ўнлар билан чекланган бўлса, бу йилги тадбирда 10 га яқин хорижий мамлакатдан 50 нафардан зиёд, шунингдек, Ўзбекистоннинг барча ҳудудларидан 350 нафардан ортиқ ҳунармандлар иштирок этди. Бу — фестивалнинг юксалаётган нуфузи, унга бўлган қизиқиш ва ишончнинг ёрқин ифодасидир.
Фестивал арафасида журналистлар учун ташкил этилган матбуот анжуманида тадбир дастури, мақсад ва режалар ҳақида атрофлича маълумот берилди. Бу эса ОАВ ва жамоатчилик ўртасида тўғридан-тўғри мулоқотни таъминлаб, очиқлик ва шаффофлик тамойилларига хизмат қилди.
“Арк” қўрғонидан бошланган фестивал “Лаби Ҳовуз”гача бўлган тантанали юриш билан очилди. Ҳар йили ушбу юриш Бухоро кўчаларини нақш ва нафосатга тўлдиради, лекин бу йилги сайр кўлами ва ундаги иштироқчилар сони билан алоҳида аҳамият касб этди.
Тадбир дастуридан ўрин олган миллий ва халқаро кўргазмалар, маҳорат дарслари, амалий санъат кўргазмалари, фолклор ансамбллар чиқишлари, миллий спорт ўйинлари ва тахт кўргазмалари ҳунармандлар учун тажриба алмашиш, маҳсулотларини кенг жамоатчиликка тақдим этиш ҳамда янги бозорларга йўл очиш имконини берди.
Фестивал доирасидаги яна бир муҳим ва эътиборли тадбир — «Силк & Spiceс Fashion Дайс» модалар намойиши бўлди. Унда маҳаллий ва хорижий дизайнерлар томонидан тайёрланган, миллий ипак матолардан тикилган замонавий либослар тақдим этилди. Бу нафақат эстетик завқ уйғотди, балки миллий матоларнинг халқаро модадаги ўрнини кўрсатди.
Бундан ташқари фестивал доирасида Чор Минор атрофида ўтказилган палов мусобақаси иштирокчилар ва томошабинлар учун унутилмас таассуротлар қолдириб, Бухоро таом маданиятини намоён этди. Ҳар бир ҳудуд ўзининг анъанавий паловини тайёрлаб, ҳакамлар ва меҳмонларга тақдим этдишди.
XXI “Ипак ва зираворлар” халқаро фестивали яна бир бор Бухоронинг нафақат миллий, балки халқаро аҳамиятга молик маданий марказ сифатидаги нуфузини тасдиқлади. Ушбу фестивал хунармандчилик ва миллий қадриятларни кенг тарғиб этиш, мамлакатимиз туризм салоҳиятини намоён этишда стратегик аҳамиятга эга тадбирлардан бирига айланмоқда.
Бу йилги фестивалнинг кўлами ва мазмун-моҳияти аввалги фестивалларга нисбатан кенгроқ, иложи борича барча жабҳаларни қамраб олди. Фестивал доирасида ташкил этилган кўргазмалар, маҳорат дарслари, дизайнерлар намойишлари, миллий таомлар танлови ва концерт дастурлари нафақат меҳмонлар, балки иштирокчиларнинг ўзларида ҳам ижобий таассурот қолдирди. Бу эса фестивалнинг маънавий ва ижтимоий таъсир кучини янада оширди.
Шу ўринда таъкидлаш жоизки, ушбу тадбир ҳунармандлар учун янги бозорлар эшигини очиш, туризм соҳасида фаолият юритувчи тадбиркорлар учун эса ҳамкорлик алоқаларини ривожлантириш имконини яратди. Халқаро даражадаги ушбу мулоқот ва тажриба алмашинуви нафақат иқтисодий жиҳатдан, балки маданий алоқаларни мустаҳкамлаш нуқтаи назаридан ҳам муҳим аҳамият касб этади.
Фестивал ҳар йили янгиланиб, мазмунан бойиб бораётгани унинг узлуксиз ривожланишда эканлигидан далолат беради. Шу боис, бу каби тадбирлар давлат ва жамият ўртасидаги ижтимоий мулоқотни мустаҳкамлаш, миллий қадриятларимизни сақлаш ва жаҳон саҳнасида муносиб тарзда намоён этишда муҳим восита бўлиб хизмат қилади.
Шериклик ҳуқуқи асосида
Изоҳ (0)