Қашқадарё вилоятининг Чироқчи туманида бир кунда аҳолига 110 хонадонли кўп қаватли уй, янги оилавий поликлиника биноси фойдаланишга топширилди. Кам таъминланган оилаларнинг 14 нафар фарзандига хатна тўйи қилиб берилди. Бу ҳақда “Дарё”га туман ҳокимлиги ахборот хизмати раҳбари Собит Абдунаимов хабар берди.
Тадбирда сўз олган туман ҳокими Файзулла Юсупов вилоятда майдони бўйича кичик, аҳоли зичлиги бўйича пешқадам бўлаётган туманда кўп қаватли турар жойлар фуқароларнинг уйларга бўлган эҳтиёжини қондиришини таъкидлаган.
“Сарбон шаҳарчаси” масъулияти чекланган жамият томонидан 18 миллиард маблағ эвазига 1 гектар ер майдонида бунёд этилган мазкур турар жойларда тумандошларимиз учун барча шароитлар муҳайё қилинган. Болалар майдончаси, кенг ва ёруғ хоналар, иссиқлик тизими, хуллас, барча-барчаси талаб даражасида. Бир сўз билан айтганда, ушбу маросим ҳақиқий тантанага айланиб кетди, — дейди ҳокимлик ахборот хизмати раҳбари.
Таъкидланишича, туманда яшовчи саховатпеша тадбиркор Абдуғани Турдиев ҳамда туман ҳокимлиги кўмагида ижтимоий ҳимояга муҳтож оилаларнинг 14 нафар фарзанди учун хатна тўй қилиб берилган.
Тадбир аввалида туман ҳокими Файзулла Юсупов сўзга чиқиб, суннат тўйлари ўтказилаётган болажонлар ва уларнинг ота-оналарига эзгу тилакларини билдирган.
“Шундай тўйларга етказганига шукр, жуда ҳам хурсандмиз. Бугун бизни оилавий ҳолатимизни инобатга олишиб, тўйлар қилиб беришиб, бизни қувонтиргани учун масъулларга мингдан минг раҳмат айтамиз. Насиб бўлса фарзандларимиз ҳоким бувамиз ва саховатпеша тадбиркорларимиздек етук инсон бўлишини тилаб қоламиз”, — дейди тўй болалардан бирининг онаси Мавлуда Ҳайдарова.
Чироқчи туманининг “Янгиқишлоқ” маҳалласида қад ростлаган 58-оилавий поликлиниканинг қишлоқ филиали биноси ҳамда “Навоий” маҳалласидаги хусусий клиниканинг фойдаланишга топширилиши одамлар қувончига сабаб бўлган.
Марказ замонавий тиббий жиҳозлар билан жиҳозланган ва малакали шифокорлар жалб қилинган бўлиб, асосий мақсад касалликларни эрта аниқлаш, беморларнинг соғлигини сақлаб қолиш ва уларга қулайлик, шинамлик яратишдир. Ушбу маскан туман аҳолиси учун яна бир совға бўлди десак адашмаган бўламиз. Сабаби 2024 йилнинг биргина январь ойида иккинчи тиббиёт муассасаси фойдаланишга топширилди.
Беш қаватли, кўп тармоқли мазкур хусусий клиника, тадбиркор Абдуғани Турдиевнинг саъй-ҳаракатлари билан 7 миллиард сўмдан зиёд маблағ эвазига бунёд этилди. Клиникада Хитой, Россия, Корея давлатларида ишлаб чиқарилган энг сўнги русумдаги 26 турдаги тиббий аппаратура ва лаборатория жиҳозлари билан таъминланган. Муассасада 12 нафар ортиқ олий тоифали шифокор ҳамда 26 нафар ҳамширалар сифатли тиббий хизмат кўрсатади, — дейди масъуллар.
Қўшимча қилинишича, хусусий клиниканинг ишга туширилиши ҳисобига 35 та янги иш ўрни яратилган бўлса, бу кўрсаткични олти ойда 60 тага етказиш кўзда тутилган.
Изоҳ (0)