Режиссёр Жеймс Ганн томонидан суратга олинган янги “Супермен” фильмидаги Крипто лақабли содиқ ит нафақат фильмда, балки ҳақиқий реал ҳаётда ҳам кўплаб инсонларга илҳом манбаи бўлди. Фильм экранларга чиқиши билан дунёнинг турли бурчакларида томошабинлар бошпанасиз ва қаровсиз қолган итларни қарамоғига ола бошлади.
Фото: PeopleTalk
Итлар ҳақида турли маълумотларни ўзида жамлаган Wоофз иловаси статистикасига кўра, фильм премерасидан кейинги илк кунларданоқ “яқин атрофдан ит боқиб олиш” каби сўровлар сони 500 фоизга ошган. Махсус қутқарувчи итларни излаш бўйича кўрсаткич ҳам 163 фоизга ортган. Томошабинлар Крипто образидан шунчалик илҳом олишдики, унинг қиёфасига ўхшаган — шнаузер зотли итларни топиш бўйича кўплаб сўровлар юборган.
Сценарий устида ишлаётган пайтда Ганн ўзининг Одзу исмли бошпанадан олиб келинган кучугини тарбиялашда қийинчиликларга дуч келган. Шу ҳолат унда савол туғдирган: “Агар итда суперқобилиятлар бўлса, нима бўларди?” Шу тарзда содиқ, лекин бир оз итоатсиз ит — Крипто образи фильмда пайдо бўлган.
Томошабинларнинг меҳрибон кайфиятидан руҳланиб, Warner Bros. кинокомпанияси Best Friends Animal Society ташкилоти билан ҳамкорликда АҚШда 1–10 июль кунлари ҳайвонларни асраб олиш харажатларини тўлаб берди. Шу даврда 454 та ҳайвон янги уйга эга бўлди. Ижтимоий тармоқларда итларни асраб олган инсонлар ва уларнинг қувноқ учрашувларини акс эттирган видеолар кенг тарқалди.
Бундан аввал ҳам айнан режиссёр Ганн фильмидан сўнг инсонларнинг ҳайвонларга муносабати ижобий томонга ўзгарган. Унинг 2023 йилда суратга олинган “Галактика қўриқчилари 3” фильми ҳайвонларга нисбатан шафқатсизлик мавзусини кўтариб чиққани учун PETА ташкилоти томонидан эътироф этилган. Эндиликда “Супермен” ҳам инсонларни эзгу ишларга ундаётган фильмга айланди. Бу эса кино санъати жамиятда ижобий ўзгаришлар қилишга қодир эканини яна бир бор кўрсатмоқда.
Изоҳ (0)