2025 йил сентябрь ойида Дубайда WOOHOO номли янги ресторан очилиши режалаштирилмоқда. Одатдаги ресторанлардан фарқли равишда бу ерда ошхонани бошқариш ва менюни тузиш жараёни тўлиқ сунъий интеллект томонидан амалга оширилади. “Келажак ресторани” деб номланган муассаса Дубай марказида, Бурж Халифа яқинида жойлашади.
Ресторан бош ошпази сифатида фаолият юритувчи Chef Aiman сунъий интеллекти минглаб халқаро рецептлар, маҳсулотларнинг молекуляр таркиби ва озиқ-овқат фанига оид илмий тадқиқотлар каби билимларга эга. СИ таомларнинг тузилмаси, кислоталилик даражаси каби параметрлар асосида менюларни режалаштиради ҳамда ноодатий ингредиентлардан тайёрланган янгича таомларни таклиф этади.
Овқатларни эса ҳақиқий ошпазлар тайёрлайди. СИ ишлаб чиққан рецептлар устида якуний ишлов бериш ва тақдимот жараёнида инсон омили муҳим ўрин тутади. Ресторан фаолиятида машҳур дубайлик ошпаз Реиф Усмон ҳам жамоага раҳбарлик қилади. Лойиҳа муаллифлари қайд этишича, СИ инсонлар меҳнатини тўлиқ алмаштиришни эмас, балки унга ижодий шерик сифатида ёрдам беришни мақсад қилган.
WOOHOO интерери футуристик услубда яратилган: унда LED панеллар, технологик ечимлар ва ҳаттоки махфий cйбер-лоунге зоналари бўлади.
Ресторан асосчиларидан бири Аҳмет Ойтун Чакирнинг айтишича, бу лойиҳа бутун гастрономия саноатида янги босқични бошлаб бериши мумкин. Келгусида Chef Aiman’дан бошқа ресторан тармоқлари ҳам фойдаланиши учун лицензиялаш режалаштирилмоқда.
Изоҳ (0)