Япониянинг Ямагата аэропортида қора айиқ сабабли кўплаб рейслар бекор қилинди. Бу ҳақда The Guardian нашри хабар берди.
Ҳодиса 26 июнь куни эрталаб содир бўлган. Бўйи тахминан 1,2 метр бўлган айиқ ўрмондан чиқиб, аэропорт ҳудудига кириб келган ва учиш-қўниш йўлагига ўтиб кетган.
Аэропорт ходимлари уни узоқ вақт давомида қувиб чиқара олмагани сабабли диспетчерлар ўнлаб рейсларни бекор қилишга мажбур бўлган. Парвозлар икки марта тўхтатилган. Аввалига кун давомида айиқ бир муддат кўринмай қолган, бироқ орадан кўп ўтмай ҳайвон яна учиш-қўниш йўлагига қайтган.
Воқеа видеоси ижтимоий тармоқларда тарқалди. Унда айиқ автомобилдан қочаётгани акс этган.
Аэропорт вакилларининг таъкидлашича, улар “иложсиз аҳволда қолган”.
Японияда одамлар ва айиқлар тўқнашуви сони рекорд даражага етган: 2023 йил апрелдан 2024 йил апрелгача 219 кишига айиқ ҳужум қилган, шулардан олти нафари ҳалок бўлган.
Олимларнинг айтишича, иқлим ўзгариши айиқларнинг қишки уйқу даври давомийлиги ва озиқ-овқат манбаларига таъсир қилмоқда. Натижада улар аҳоли яшайдиган ҳудудларга чиқиб келмоқда.
Изоҳ (0)