Ўзбек кино санъатида ўчмас из қолдирган бир қатор актрисалар турмуш ёки шахсий сабабларга кўра санъатдан чекиниб, ҳаётини АҚШда давом эттирмоқда. Ушбу мақолада санъатни тарк этиб, океан ортида янги саҳифа очган машҳур ўзбек актрисалари ҳаёти билан танишасиз.
Дилором Қамбарова — Ўзбекистонда хизмат кўрсатган артист
Дилором Қамбарова ўзининг бетакрор роллари билан ўзбек томошабинлар қалбидан жой олган актриса ҳисобланади. У “Темир хотин”, “Тўйлар муборак” фильмларида рол ижро этган. Актриса 90 йилларнинг иккинчи ярмида санъатдаги фаолиятига нуқта қўйиб, Америка Қўшма Штатларига кўчиб кетишга қарор қилган. У АҚШда бир муддат модалар уйида ишлаган. Бугунги кунда 68 ёшда бўлган Дилором Қамбарова уй бекаси. У ижтимоий тармоқлар ва омма эътиборидан холи яшашни маъқул кўради.
Камола Умархўжаева
Камола Умархўжаева “Севги”, “Аёллар салтанати”, “Ёдгор” каби фильмлардаги образлари билан танилган актриса. У 2004 йилдан буён АҚШда истиқомат қилади. Актриса сўнгги марта 2010 йилда “Қабрдан қайтган умр” фильмида суратга тушган. Шундан кейин у санъат соҳасидаги фаолиятини якунлаган. Камола Умархўжаева 4 нафар фарзанднинг онаси бўлиб, бугунги кунда оиласи билан Вашингтон шаҳрида яшайди.
Гулчеҳра Эшонқулова
“Фотима ва Зуҳра”, “Паноҳ”, “Шабнам” ва “Жаноб ҳеч ким” фильмларидаги образлари билан томошабинларга яхши таниш бўлган актриса. Гулчеҳра Эшонқулова бундан бир неча йиллар аввал ўз фаолиятини якунлаб, оиласи билан океан ортига кетган. Актриса АҚШга боргач, ўз вақтини тил ўрганиш ва фарзандлари тарбиясига бағишлади. 43 ёшда бўлган Гулчеҳра Эшонқулова ҳозирда бир ўғил ва бир қизнинг онаси.
Дурдона Турсунбоева
Дурдона Турсунбоева кўпчилигимизга “Оталар сўзи — ақлнинг кўзи” кўрсатувидаги чиқишлари билан яхши таниш бўлган актриса. У ҳам санъатни тарк этиб, 14 йилдан буён АҚШда яшамоқда. Актриса бугунги кунда икки ўғилнинг онаси. У ҳозирда турмуш ўртоғи билан бирга заргарлик буюмлари бизнеси билан шуғулланади.
Гулнора Қосимова
“Қайтар дунё”, “Иблис девори”, “Менинг акам бўйдоқ”, “Нотаниш” каби фильм ва сериаллардаги роллари билан томошабинларга таниш бўлган актриса Гулнора Қосимова 2010 йилдан буён Америка Қўшма Штатларида яшайди. Актриса интервьюларидан бирида санъат соҳасини тарк этмагани, бироқ фаолиятида узоқ танаффус бўлаётганини таъкидлаган. У 2013 йилда АҚШда турмушга чиққан. Бугунги кунда у икки ўғлининг тарбияси билан банд.
Изоҳ (0)