Аввалроқ Москва вилоятида генерал Игор Кириллов ва унинг ёрдамчиси Илья Поликарповни ўлдирганликда гумонланиб, Ўзбекистон фуқароси қўлга олингани ҳақида хабар берилганди. Ўзбекистоннинг Россиядаги элчихонаси ҳолат бўйича изоҳ берди.
Элчихона 17 декабрь куни содир этилган теракт иши доирасида Ўзбекистон фуқароси ҳибсга олингани ҳақидаги тарқалган маълумотларга эътибор қаратди.
Дипломатик ваколатхона қабул қилувчи давлат ҳуқуқ-тартибот идоралари билан алоқада бўлиб, ушбу воқеани содир этганликда гумон қилинган шахс ҳақидаги маълумотни аниқлаштирмоқда.
Игор Кириллов ва унинг ёрдамчиси Илья Поликарповнинг ўлими
Россия ФХХга кўра, 17 декабрь куни генерал ва ёрдамчисининг ўлимига сабаб бўлган терактни амалга оширган шахс бомбани электр самокатга ўрнатган. Ўзбекистон фуқароси кузатув учун каршеринг машинасини ижарага олиб, унга Wi-Fi камерасини улаган. Тасвирлар эса Днепропетровскдаги теракт ташкилотчиларига узатилгани маълум қилинган.
Таъкидланишича, генерал ва ёрдамчиси подъезддан чиқиши ҳақида видеосигнал олингандан сўнг, Украина разведкаси масофадан туриб бомбани ишга туширишга кўрсатма берган.
“Қотиллик содир этган Ўзбекистон фуқаросига Украина махсус хизматлари томонидан 100 минг АҚШ доллари миқдорида мукофот пули ва Европа иттифоқига чиқиш ваъда қилинган”, дейилади Россия ФХХ баёнотида.
Қотилликда гумонланган ўзбекистонлик эркак Москва вилояти Балашиха туманидаги Черное қишлоғида қўлга олинган.
Изоҳ (0)