Европа етакчилари ва Украина президенти Владимир Зеленский 13 август куни АҚШ президенти Дональд Трамп билан телефон орқали суҳбат ўтказади. Телефон орқали мулоқот Дональд Трампнинг Путин билан мулоқотидан 2 кун аввал бўлади. Бу ҳақда UNIAN агентлиги хабар берди.
Манбага кўра, суҳбатда АҚШ вице-президенти Жей Ди Венс ҳам иштирок этади. Шунингдек, мулоқотда Германия канцлери Фридрих Мерц, Франция президенти Эммануэл Макрон, Буюк Британия бош вазири Кир Стармер, Италия, Польша ва Финляндия ҳукумат раҳбарлари қатнашади.
Қайд этилишича, бу мулоқот давомида Россияга босим ўтказишнинг келажакдаги вариантлари муҳокама қилинади. Қолаверса, ҳудудий ва хавфсизлик масалалари кўриб чиқилади.
Таъкидланишича, Украина ва унинг Европадаги ҳамкорлари урушни ҳозирги позицияларда музлатишни илк қадам сифатида кўрмоқда. Кейинчалик узоқ муддатли тинчлик келишувига эришиш мумкин.
Путин эса Донбасс ва Қримнинг халқаро ҳамжамият томонидан Россия ҳудуди сифатида тан олинишини музокара бошлашнинг бош шарти сифатида кўрсатмоқда.
Украина президенти Зеленский ҳудудлардан воз кечмоқчи эмас. Европа давлатлари уни қўллаб-қувватлашда давом этишга ваъда берган. Лекин европаликлар Путин ва Трампнинг учрашувидан хавотирланмоқда, чунки улар Европанинг айрим талабларини эътиборсиз қолдирган ҳолда келишувга эришиши мумкин.
Изоҳ (0)