Эрон Олий суди 2023 йил январида Теҳрондаги Озарбайжон элчихонасига қуролли ҳужум уюштирган Ясин Ҳусайнзодани ўлим жазосига ҳукм қилди, деб хабар бермоқда АзTV Озарбайжон давлат телеканали.
2023 йил 27 январь куни Озарбайжоннинг Эрондаги элчихонасига қуролли ҳужум уюштирилганди. Калашников автоматини кўтарган эркак дипломатик миссия хавфсизлик хизмати раҳбарини ўлдирди. Ҳужумни қайтариш чоғида элчихонанинг яна икки ходими яраланди. Кейинроқ ҳужум лаҳзалари акс этган видео эълон қилинди.
ОАВ элчихонада отишма содир этган эркак буни оилавий сабабларга кўра қилгани ҳақида ёзди. У ярим йилдан ортиқ вақтдан бери бедарак кетган рафиқасини шу дипломатик ваколатхона биносида деб ўйлаган.
Озарбайжон президенти Илҳом Алиев томонидан теракт сифатида баҳоланган ушбу воқеадан сўнг Озарбайжон ҳукумати Теҳрондаги элчихонанинг барча ходимлари ва уларнинг оила аъзоларини эвакуация қилишга қарор қилди. Эвакуация 29 январь куни амалга оширилди.
Ҳозирда фақат Табризда Озарбайжоннинг Бош консулхонаси фаолият юритмоқда.
Изоҳ (0)