Тахтақорача довонида Cobalt'га тош қулаши оқибатида ҳалок бўлганларнинг икки нафари Венгрия фуқароси бўлган. Бу ҳақда Ўзбекистоннинг Венгриядаги элчихонаси маълум қилди.
Ҳолат 6 ноябрь куни Қашқадарё вилоятининг Китоб туманидан ўтган Самарқанд ва Қашқадарё вилоятларини боғловчи М-39 автомобиль йўлининг 1138-километрида содир бўлганди. Автомашина ичидаги 3 нафар фуқаро воқеа жойида вафот этган.
“Ўзбекистон Республикасининг Венгрияда элчихонаси Китоб—Самарқанд йўлида Қашқадарё вилоятида тошлар қулаб тушиши натижасида икки нафар Венгрия фуқаросининг фожиали ҳалок бўлганлиги ҳақидаги хабарни чуқур қайғу билан қабул қилди. Вафот этганларнинг яқинларига ва оила аъзоларига самимий ҳамдардлик билдирамиз. Ушбу бахтсиз ҳодиса, афсуски, дунёнинг исталган нуқтасида содир бўлиши мумкин бўлган табиий офат натижасида рўй берди”, дейилади элчихона хабарида.
Қайд этилишича, Ўзбекистон томони барча тафсилотларни аниқлаш учун синчковлик билан тергов ўтказмоқда.
Элчихона ҳалок бўлганларнинг жасадларини ватанларига тез орада қайтаришда тўлиқ ёрдам беришга тайёрлигини билдирди.
Изоҳ (0)