YouTube’даги Daryo Lifestyle каналида актриса Ҳувайдо Жумаева билан суҳбат ташкил этилди. У қийинчилик билан театрга ишга қабул қилингани, ножоиз таклифлар ва гап-сўзлар сабаб оилавий муносабатларига путур етгани ҳақида гапирди.
“Ўз амплуамни биламан”
— Ташқи кўринишим қандай ролларга мос келишини яхши биламан. Шу боис Жамила ёки Нодирабегим каби бош ролларни ижро этишни орзу қилмаганман. Мен раҳматли актриса Дилбар Икромованинг ижодига қизиқардим. У “Келинлар қўзғолони” ва “Чимилдиқ” каби фильмларда бош ролларни ижро этмаган бўлса-да, томошабинлар меҳрини қозонган. Уч йил давомида Ўзбек Миллий академик драма театрида шартнома асосида ишладим. Саҳнага чиқиб, ижро этган ролимиз учун 3 минг сўм гонорар ёзишарди. Аммо ойлаб давом этадиган тайёргарлик жараёнлари учун пул ёзилмасди. “Бу ой фалонча спектаклда рол ижро этдим, 60 минг сўм гонорар оламан”, деб қувониб юрган пайтимизда қўлимизга 40 минг сўмни тутишарди.
Ҳақимизни талаб қиладиган бўлсак, “хоҳламасанг, кет” деган гапни айтишарди. Саҳнага чиқяпмиз-ку, деб индамай ишлайверардик. Шундай қийин шароитда 7-8, ҳатто 12 йилда штат асосида ишга қабул қилинганларни биламан. Ҳатто курсдошим Дилноза Кубаева ҳам 3 йил деганда театрга штат асосида ишга олинган. Бошлиқларнинг иши бўлмасди, худдики ўлсанг, ўлиб кетавермайсанми дегандек муносабатда бўлишарди, дейди Ҳувайдо Жумаева.
“Хотирамни йўқотиб қўйишни истадим”
— Сурхондарёнинг оддий қишлоғига келин бўлганман. У ердагилар санъатни нотўғри тушунишарди. Артистни тўйга чиқиб, ҳаёсиз хатти-ҳаракатлари билан пул топадиган деб тушунишарди. Турмуш ўртоғим ҳам, унинг оила аъзолари ҳам санъатимни тушунишмади. Жуда кўп низоларга борганимиздан кейин санъатдан кетишга қарор қилдим. Чунки менга оила ёки ижодни танлаш йўли бор эди.
Шундай пайтларда қанийди, хотирамни йўқотиб қўйсам-у, телевизорга чиққан кунларимни эслай олмасам деб орзу қилардим. Уйдагиларнинг ишончини қозонишим учун кўп сабр қилишимга тўғри келди. Шукрки, ҳозир ижодимни қўллаб-қувватлашади, ҳатто мендек келинлари борлигидан фахрланишади. Мен болаларим бахти учун оиламни сақлаб қолишга ҳаракат қилганман ва бундан ҳеч қачон афсусланмайман, дейди Ҳувайдо Жумаева.
“Қўрқиб кетиб, санъатдан кетаман деганман”
— Отам раҳматли ниҳоятда чиройли тарбия берган. У қаттиққўл ва тартибни яхши кўрадиган инсон эди. Унинг ёнида бемалол ўтиролмасдик, салобати босарди. Тошкентга келганимдан кейин ҳам унинг олдидаги масъулиятни ҳис қилганман. Институтда ўқиётганимда Баҳора исмли дугонам билан қаҳвахонада ишлаганмиз. Полларни, идишларни ювганмиз, у ернинг хўжайини бизга 70 минг сўм бериши керак эди. Қўлимга 15 минг сўмни тутиб, “Истайсанми, уй-жой қилиб бераман”, деган. Унинг нияти бузуқлигини билиб, берган пулини стол устига қўйиб қочиб кетганман. Анча вақтгача қўрқиб яшаганман, худдики бир айб иш қилиб қўйгандек ҳис қилардим.
Ўйлаб қарасам, оилада олган тарбиям мени кўп ёмонликлардан асраган. Санъатда ҳам шундай таклифлар бўлган, “Ишинг ҳам, ролинг ҳам керакмас, рози бўлгандан кўра тинчгина санъатдан кетаман”, деганман. Ҳозир ҳаммаси яхши, оилам, турмуш ўртоғим ва севимли касбим бор, дейди Ҳувайдо Жумаева.
Суҳбатни тўлиқ ҳолда YouTube’даги Daryo Lifestyle каналида томоша қилишингиз мумкин.
Изоҳ (0)