АҚШ Махфий хизмати 15 август куни бўлиб ўтадиган Владимир Путин ва Дональд Трамп президентлари саммити олдидан Алясканинг энг йирик шаҳри Анкорижда олти хонали уйни ижарага олган. Бу ҳақда кўчмас мулк агенти Ларри Дисброуга таяниб, The New York Times газетаси хабар бермоқда.
“Бугун эрталаб АҚШ Махфий хизматидан мен билан боғланишиб, менинг ихтиёримдаги кўчмас мулк объектлари мавжудлигини сўрашди. Тарихий нуқтаи назардан Алясканинг бундай учрашувлар учун жозибадор жой эканлигини тушунаман. Аммо бу мени ҳайратга солди, албатта”, деди Дисброу.
Маълумотларга кўра, Оқ уй учрашув ўтказиладиган аниқ жойни эълон қилмаган.
Анкориж мэри Сюзанна ЛаФранснинг газетага айтишича, у саммитнинг ўз шаҳрида ўтказилиши мумкинлиги ҳақида ҳеч қандай маълумот олмаган. У Аляска учун етакчиларни қабул қилиш “одатий ҳол” эканлигини таъкидлаб, штатни “бутун дунё йўллари чорраҳаси” деб атаган.
Трамп ўзининг биринчи президентлик муддати давомида Аляскага камида беш марта ташриф буюрган бўлиб, кўпинча Элмендорф-Ричардсон қўшма ҳарбий базасида тўхтаган. Путин билан учрашув республикачининг январь ойида Оқ уйга қайтганидан бери штатга биринчи расмий ташрифи бўлади.
Маълумот учун, Махфий хизмат АҚШ Ички хавфсизлик вазирлигига бўйсунади. Унинг вазифаларига президент ва вице-президент, собиқ давлат раҳбарлари ва уларнинг оила аъзолари ҳамда бошқа юқори мартабали амалдорларнинг хавфсизлигини таъминлаш киради. Хизмат ходимлари тадбирлар ўтказиладиган жойларни кўздан кечириб, ҳуқуқ-тартибот органлари билан ҳамкорликда хавфсизлик чораларини текширади.
Трамп 8 август куни 15 август куни Аляскада Путин билан учрашишга умид қилаётганини маълум қилган эди. Кейинчалик бу музокараларни ўтказиш режаларини Россия президенти ёрдамчиси Юрий Ушаков тасдиқлади. Унинг айтишича, раҳбарлар Украина инқирозини узоқ муддатли тинч йўл билан ҳал қилиш вариантларини муҳокама қилишга эътибор қаратишади. Ушаков яна аниқлик киритиб, Кремль Путин ва Трампнинг навбатдаги учрашуви Россия ҳудудида бўлиб ўтишини кутаётганини билдирди.
Изоҳ (0)