Белгороддаги полигонда содир этилган терактга Тожикистон фуқароларининг алоқадорлиги ҳақидаги маълумотлар текширилмоқда. Бу ҳақда Тожикистон ташқи ишлар вазирлиги матбуот хизматига таяниб, «РИА Новости» хабар берди.
«Москвадаги элчихона воқеага Тожикистон фуқароларининг алоқадорлигини аниқлашга ҳаракат қилмоқда», — дейилади баёнотда.
17 октябрь тонгда тожикистонлик кўнгиллилар 1999 ва 1998 йилларда туғилган Аминзод Тожиддин ва Меҳроб Раҳмоновлар Белгороддаги ҳарбий полигонда ўт очгани ҳақида хабар берилган. Қайд этилишича, улар 11 октябрь куни Валуйский шаҳар тумани, Солоти қишлоғида жойлашган ҳарбий қисмга келиб жойлашган.
15 октябрь куни Белгород вилоятидаги ҳарбий қисмлардан бирида МДҲнинг ушбу икки фуқароси ўт очган. Мудофаа вазирлиги ҳодисани теракт сифатида баҳолади. Оқибатда 11 киши ҳалок бўлган, яна 15 киши жароҳатланган. Россия Мудофаа вазирлиги маълумотларига кўра, терактни содир этганлар жавоб ўқларидан ўлим топган. Манбанинг хабар беришича, Валуйский туманидаги отишма эрталаб соат 10 лар атрофида содир бўлган.
16 октябрь Россия Тергов қўмитаси машғулотлар полигонидаги отишма бўйича жиноий иш очди. РФТ иш қайси модда бўйича очилганига аниқлик киритмаган.
Изоҳ (0)