«Дарё» нашри 11 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Қозоғистон ва Ўзбекистон элчихонаси Украинадаги ватандошларини мамлакатни тарк этишга чақирди
Қозоғистоннинг Украинадаги элчихонаси Украина ҳудудида бўлиб турган қозоғистонликларга мурожаат қилиб, улардан иложи бўлса мамлакатни тарк этишни сўради.
11 октябрь куни Ўзбекистоннинг Украинадаги элчихонаси ҳам мамлакат шаҳарларига ракета ҳужумларининг кучайиши ортидан Ўзбекистон фуқароларини ушбу давлатни тарк этишга чақирди. Элчихона, шунингдек, зиддият ўз изига тушгунига қадар Украинага саёҳат қилмасликни сўраган.
Эслатиб ўтамиз, 10 октябрь куни эрталаб Россия қўшинлари Украина шаҳарларини ракеталардан ўққа тута бошлади. Отишмада тинч аҳоли орасида қурбонлар бўлди, фуқаролик инфратузилмаси объектлари жиддий зарар кўрди, электр энергияси узилди.
Жаҳондаги айни вазият юзасидан, Польша Ташқи ишлар вазирлиги ўз фуқароларига Беларусга бормасликни, у ердаги польшаликларга эса республикани тарк этишни тавсия қилди. Тегишли баёнот вазирликнинг расмий сайтида пайдо бўлди. «Минтақада кескинликнинг кучайиши, ҳарбий ҳодисалар ва Польша фуқароларининг ҳибсга олиниши билан боғлиқ такрорий ҳолатлар муносабати билан ТИВ Польша фуқароларига Беларусь республикасига бормасликни тавсия қилади», — дейилади хабарда.
Вазирлик таъкидлашича, «хавфсизлик ҳолати кескин ёмонлашганда, чегаралар ёпилганда ёки бошқа кутилмаган вазиятларда эвакуация қилиш сезиларли даражада қийин, ҳатто имконсиз бўлиб қолиши мумкин».
Украинанинг бутун ҳудуди бўйлаб ҳаво тревогаси эълон қилинди
11 октябрь куни эрталаб Украинанинг Винница вилоятидаги Ладижин иссиқлик электр станциясига иккита Shahed-136 камикадзе-дронлари ҳужум қилди, бу ҳақда вилоят маъмурияти раҳбари Сергей Борзов маълум қилди. «Жануб» ҳаво қўмондонлиги хабарига кўра, 11 октябрга ўтар кечаси Николаев вилоятида бешта, Одесса вилоятида эса учта Shahed-136 дронлари ҳаво ҳужумига қарши мудофаа тизими томонидан йўқ қилинган.
11 октябрь куни эрталаб Украинанинг аксарият вилоятларида яна ҳаво тревогаси эълон қилинди. Кейинроқ эса бутун Украина ҳудуди бўйлаб ҳаво тревогаси ҳақида хабар берилди.
Айни вазият юзасидан, Британия бош вазири Лиз Трасс Россиянинг Украинага ракета ҳужумлари туфайли НАТО етакчиларини шошилинч йиғилишга чақирмоқчи. Британия ҳукумати раҳбари бугун, 11 октябрь куни онлайн форматда бўлиб ўтадиган G7 саммитида тегишли мурожаат билан чиқади.
Путин ҳарбий тўнтаришдан хавфсирамоқда: Миллий гвардия Москвада тўлиқ жанговар шайликка келтирилди
Россия президенти Владимир Путин давлат тўнтаришидан хавфсираб, Москвага Тезкор топшириқли алоҳида бўлим (ОДОН)ни жойлаштирди, деб хабар бермоқда The Mirror Украина разведкасидаги манбаларига таяниб.
Таъкидланишича, ОДОН бўлинмалари Россия пойтахтини қўриқлашни кучайтирган ва бўлинманинг барча ҳарбийлари тўлиқ жанговар шайликка келтирилган. Путиннинг 18 минг кишилик қўриқлов хизмати гумон остига тушган ҳарбий хизматчиларни ҳибсга олиб, Москвага киришда эса блокпостлар ўрнатишни бошлаган. Ушбу бўлинмага генерал майор Николай Кузнецов раҳбарлик қилади. Воқеалар Путин Украина махсус хизматларини Қрим кўпригидаги «теракт»да айблаганидан кейин содир бўлган.
Ушбу ҳолат юзасидан Буюк Британия Ҳукумат алоқа маркази раҳбари Жереми Флеминг ўз маърузасида қуйидагича сўз юритади. Украина «ҳолдан тойган» Россия кучларига қарши урушда вазиятни ўзгартирмоқда. Россия армияси заиф ҳолатда, унинг аввалги ютуқлари эса мағлубиятларга айланмоқда. BBC маърузадан олинган парчаларни эълон қилган.
«Украинанинг жанг майдонидаги ва кибермакондаги дадил ҳаракатлари вазиятни ўзгартирмоқда», — деди Флеминг. Унинг сўзларига кўра, ҳокимият ҳеч нарса билан чекланмагани туфайли Россия президенти Владимир Путиннинг қарорлари хато бўлиб чиққан.
Аввалроқ Россия ташқи ишлар вазири Сергей Лавров март ойида Истанбулда бўлиб ўтган Россия—Украина музокараларида томонлар вазиятни «ҳал қилиш ёндашуви» бўйича келишиб олишга тайёр бўлганини айтган эди. Вазирнинг таъкидлашича, ўшанда Киевнинг шартлари бўйича сулҳга эришиш мумкин бўлган. Аммо музокаралар «АҚШ ва Лондоннинг бевосита буйруғи билан» тўхтатилган.
ОТМларнинг 1-курс талабаларига 2 ойлик ижара компенсацияси ҳеч қандай шартномасиз тўлаб берилади
Ўзбекистонда ижарада турадиган 1-курс талабаларига 2 ойлик ижара компенсацияси ҳеч қандай шартномасиз тўлаб берилади. Ноябрдан бошлаб, ижара шартнома бўлса, кейин компенсация берилади. Бу ҳақда ҳуқуқшунос Хушнудбек Худойбердиев ёзмоқда.
Қайд этилишича, Вазирлар Маҳкамасининг баёнига биноан, талабалар сафига қабул қилинган ва талабалар турар жойи билан қамраб олинмаган узоқ ҳудудлардан келган биринчи курс талабаларига, истисно тариқасида, олий таълим муассасаларига ажратилган маблағлар доирасида сентябрь ва октябрь ойлари учун ижара шартномаси талаб этмасдан ижара компенсацияси тўлаб берилади. Ижара шартномасини тақдим этган талабаларга ноябрь ойидан тўловлар давом эттирилади.
Изоҳ (0)