АҚШ президенти Дональд Трамп 15 август куни Аляскада Россия раҳбари Владимир Путин билан бўладиган самарали учрашувни кутаётганини билдирди. Бу ҳақда у 11 август куни бўлиб ўтган матбуот анжуманида айтиб ўтган.
Трампнинг таъкидлашича, Аляскадаги Путин билан учрашув кўпроқ дастлабки характерга эга бўлади ва унда Украина президенти Владимир Зеленскийнинг иштирок этиши режалаштирилмаган. У Путин билан учрашувдан сўнг Россия президентининг Зеленский билан учрашувини ёки уч томонлама саммитни кутаётганини қўшимча қилган. Шунингдек, у АҚШ ҳудудлар алмашинувини ташкил этишга ҳаракат қилишини маълум қилган.
“Мен Владимир Путин билан гаплашаман ва унга “Сен бу урушни тўхтатишинг керак”, дейман”, деди Трамп можарони ҳал қилиш бўйича Москва ва Киев учун манфаатли бўлган келишув ишлаб чиқишга интилишини қўшимча қилиб.
Шу билан бирга, АҚШ раҳбари Россия раҳбари билан учрашув натижаларига кўра Украина бўйича музокаралар жараёнидан чиқиш эҳтимолини истисно қилмаган.
“Мен кетиб, “омад тилайман” дейишим мумкин. Шу билан тамом бўлади”, деди АҚШ раҳбари.
“Путин бутун Украинани хоҳлаган, деб ҳисобловчилар бор. Айтганча, мен ҳам шундай фикрдаман. Ўйлайманки, агар мен бўлмаганимда, у ҳозир ҳеч ким билан гаплашмасди ҳам. Лекин мен у билан учрашмоқчиман. Биз битим шартларини муҳокама қиламиз. Кейин эса президент Зеленский ва Европа раҳбарларига қўнғироқ қиламан”, деди Оқ уй раҳбари.
Бундан аввал АҚШ президенти Дональд Трамп ўзининг Truth Social ижтимоий тармоғидаги саҳифасида россиялик ҳамкасби Владимир Путин билан 15 август куни Аляскада учрашишни режалаштирганини маълум қилди. Президентлар можарони узоқ муддатли ҳал этиш вариантларини муҳокама қиладилар.
Изоҳ (0)