Ўзбекистоннинг Исроилдаги элчихонаси фуқароларга мурожаат билан чиқди

Ўзбекистоннинг Исроилдаги элчихонаси мамлакатда истиқомат қилаётган ватандошларга мурожаат билан чиқиб, хавфсизлик чораларини кўришга чақирди.

“Ҳозирги пайтда мамлакатнинг шимолий ҳудудларида мураккаб вазият вужудга келаётганини эътиборга олиб, ўзингизнинг шахсий хавфсизлик чораларини кўришингизни ва ракета отишмалари пайтида бошпаналарни тарк этмасликни тавсия этамиз”, дейилади мурожаатда.

Фуқаролар Исроил ҳукумати ва Ўзбекистон элчихонаси расмий хабарларини кузатиб боришга чақирилди. Шунингдек, Исроил фронторти қўмондонлигидан билдиришномалар ва огоҳлантиришлар (Ҳоме Фронт Cомманд) мобил иловаси ёки веб-сайти ҳаволасини телефонга ўрнатиб олиш сўралди.

 “Заруриятсиз кўчага ва бошқа кўнгилочар муассасаларга ташриф буюрманг. Илтимос, ўз ҳаётингизни эҳтиёт қилинг”,  дейилади мурожаатда.

Элчихона консуллик бўлими ишонч телефонлари:

•  03-672-2466
•  03-672-2371
•  03-758-5075
•  03-758-5076

 Фавқулодда ҳолатларда ва шошилинч хабарлар учун:

+972 54 485 1397

23 сентябрь куни Исроил мудофаа вазири Йоав Галант Ливанда “Шимол ўқлари” деб номланган ҳужум операциясини эълон қилган эди. Исроил бош вазири Биньямин Нетаньяху маҳаллий аҳолини “Ҳизбуллоҳ” муассасалари яқинидаги ҳудудларни тарк этишга чақирган. 24 сентябрь куни Исроил мудофаа кучлари Ливандаги “Ҳизбуллоҳ” инфратузилмасига қарши давом этаётган “Шимол ўқлари” операцияси доирасида янги зарбалар сериясини эълон қилди.