Озарбайжон президенти Илҳом Алиев Боку ва Теҳрон ўртасидаги муносабатларнинг нормаллашиши Эрон расмийлари Озарбайжоннинг Эрондаги элчихонасига уюштирилган терактга алоқадор барча шахсларни аниқлаб, жавобгарликка тортгандан кейингина мумкинлигини айтди. Бу ҳақда “Интерфакс” хабар берди.
“Элчихонамизга қилинган терактдан хабарингиз бор. Бу Озарбайжон дипломатик миссиясига қарши уюштирилган террорчилик ҳаракати эди. Террорчи 30-40 дақиқа давомида қуролсизлантирилмади, полиция машиналари ва хавфсизлик ходимлари келиб-кетди, лекин унга икки марта элчихона биносига киришга, элчихона қўриқчиларидан бирини ўлдиришга ва яна икки кишини жароҳатлашга рухсат берилди”, — деди Алиев Озарбайжон журналистларига берган интервьюсида.
Унинг сўзларига кўра, террорчини қуролсизлантирган қўриқчилардан бирининг жасорати ўнлаб озарбайжонликларнинг ҳаётини сақлаб қолган бўлиши мумкин.
“Чунки бу уйда дипломатларимизнинг оилалари, жумладан уларнинг фарзандлари яшаган. Шунинг учун бу ишнинг зудлик билан ва ошкора тергов қилинишини талаб қиламиз. Террорчининг терактдан сўнг Эрон матбуотига интервью бергани унинг Эрон тузумининг айрим вакиллари томонидан юборилганидан далолат беради. Унинг икки кундан кейин ақли заиф деб тан олиниши ҳам ғалати. Қандай қилиб улар шунчалик тез экспертиза ўтказди? Бу унинг адолатдан қочиши учун қилинган ҳаракат эди”, — деди президент.
2023 йилнинг 27 январь куни Озарбайжоннинг Эрондаги элчихонасига қуролли ҳужум уюштирилди. Калашников автомати билан қуролланган террорчи дипломатик миссия хавфсизлик хизмати раҳбарини ўлдирди. Қуролли ҳужумни қайтариш чоғида унинг яна икки ходими яраланди. Президент Илҳом Алиев томонидан теракт сифатида баҳоланган ушбу ҳодисадан сўнг Озарбайжон ҳукумати Теҳрондаги элчихонанинг барча ходимлари ва уларнинг оила аъзоларини эвакуация қилишга қарор қилди.
Эвакуация 29 январь куни амалга оширилган. Ҳозирда Озарбайжоннинг Теҳрондаги элчихонаси фаолияти тўхтаган. Эрон расмийлари элчихонага ҳужум қилган шахс шахсий сабабларга кўра ҳаракат қилган деган версияда туриб олди. Боку, ўз навбатида, бу версияни қабул қилмаслигини билдирган.
Изоҳ (0)