Атом энергияси бўйича халқаро агентлик (МАГАТЭ) билан ҳамкорлик фақат Эроннинг ядро дастурига нисбатан икки ёқлама стандартлари бартараф этилгандагина қайта тикланиши мумкин. Бу ҳақда Эрон президенти Масъуд Пезешкиён Европа кенгаши раиси Антониу Кошта билан телефон орқали суҳбатда маълум қилган.
Президент маъмурияти томонидан эълон қилинган баёнотга кўра, томонлар асосий халқаро воқеаларни, жумладан, Эрон ва Исроил ўртасидаги 12 кунлик қуролли тўқнашувни, шунингдек, Эрон ва Европа Иттифоқи ўртасидаги муносабатлар ривожланишини муҳокама қилишган.
Пезешкиан ўз мамлакатининг дипломатия, ўзаро ҳурмат ва халқаро ҳуқуқ нормаларига риоя қилиш тамойилларига содиқлигини тасдиқлаган.
У парламентнинг МАГАТЭ билан ҳамкорликни тўхтатиш тўғрисидаги қарори агентлик раҳбари Рафаэл Гроссининг “нохолис ва нопрофессионал ҳаракатлари”га жавобан қабул қилинганини таъкидлаган.
Шунингдек, Пезешкиён ўтган йилларда Эрон ва МАГАТЭ ўртасидаги фаол ҳамкорликни эслатиб ўтган.
“Бу ҳамкорликни давом эттириш фақат Эроннинг ядро дастурига нисбатан икки ёқлама стандартлари бартараф этилгандагина мумкин бўлади. Ҳар қандай тажовуз такрорланса, янада қатъийроқ ва ҳалокатли жавоб берилади”, деди Эрон президенти.
Шунингдек, у ЕИ билан муносабатларни кенгайтириш ва “конструктив ҳамда ҳурматга асосланган мулоқот" доирасида мунозарали масалаларни ҳал қилишга тайёрлигини билдирган.
Еврокенгаш раиси Европа Иттифоқининг Эрон билан дипломатик келишув ва ҳамкорликни давом эттиришга интилишини тасдиқлаган. Унинг таъкидлашича, халқаро ташкилотлар икки ёқлама стандартларнинг ҳар қандай шаклларидан қочишлари керак.
Кошта Пезешкианга Исроил зарбалари оқибатида эронликлар ҳалок бўлгани муносабати билан ҳамдардлик билдирган ва Ғазодаги вазиятга тўхталган.
“Европа Иттифоқи Исроил томонидан Ғазода инсон ҳуқуқлари бузилишини қоралайди, дарҳол ўт очишни тўхтатиш, гуманитар ёрдам етказиб бериш ва Фаластин халқига самарали ёрдам кўрсатишни талаб қилади”, деди Кошта.
Июнь ойи охирида Эрон президенти Масъуд Пезешкиён Халқаро атом энергетикаси бўйича агентлик (МАГАТЭ) билан ҳамкорликни тўхтатувчи қонунни имзолаганди.
Исроил 13 июнь кечаси Эронга зарбалар беришни бошлади. Уларнинг мақсади Теҳроннинг ядро ва ракета дастурлари билан боғлиқ объектлар эди. Бир суткадан камроқ вақт ўтиб, Эрон жавоб ҳужумини амалга оширди. 22 июнь кечаси АҚШ Қуролли кучлари Эроннинг учта ядровий объектига ҳужум қилди, 23 июнь кечқурун эса Теҳрон Қатардаги Яқин Шарқнинг энг йирик Ал-Удейд Америка ҳаво базасига ракета зарбалари берди. Кейинроқ АҚШ президенти Дональд Трамп Исроил ва Эрон ўт очишни тўхтатиш режимига келишиб олганини маълум қилди. Бу келишув 24 июндан кучга кирди.
Изоҳ (0)