Atom energiyasi bo‘yicha xalqaro agentlik (MAGATE) bilan hamkorlik faqat Eronning yadro dasturiga nisbatan ikki yoqlama standartlari bartaraf etilgandagina qayta tiklanishi mumkin. Bu haqda Eron prezidenti Mas’ud Pezeshkiyon Yevropa kengashi raisi Antoniu Koshta bilan telefon orqali suhbatda ma’lum qilgan.
Prezident ma’muriyati tomonidan e’lon qilingan bayonotga ko‘ra, tomonlar asosiy xalqaro voqealarni, jumladan, Eron va Isroil o‘rtasidagi 12 kunlik qurolli to‘qnashuvni, shuningdek, Eron va Yevropa Ittifoqi o‘rtasidagi munosabatlar rivojlanishini muhokama qilishgan.
Pezeshkian o‘z mamlakatining diplomatiya, o‘zaro hurmat va xalqaro huquq normalariga rioya qilish tamoyillariga sodiqligini tasdiqlagan.
U parlamentning MAGATE bilan hamkorlikni to‘xtatish to‘g‘risidagi qarori agentlik rahbari Rafael Grossining “noxolis va noprofessional harakatlari”ga javoban qabul qilinganini ta’kidlagan.
Shuningdek, Pezeshkiyon o‘tgan yillarda Eron va MAGATE o‘rtasidagi faol hamkorlikni eslatib o‘tgan.
“Bu hamkorlikni davom ettirish faqat Eronning yadro dasturiga nisbatan ikki yoqlama standartlari bartaraf etilgandagina mumkin bo‘ladi. Har qanday tajovuz takrorlansa, yanada qat’iyroq va halokatli javob beriladi”, dedi Eron prezidenti.
Shuningdek, u YI bilan munosabatlarni kengaytirish va “konstruktiv hamda hurmatga asoslangan muloqot" doirasida munozarali masalalarni hal qilishga tayyorligini bildirgan.
Yevrokengash raisi Yevropa Ittifoqining Eron bilan diplomatik kelishuv va hamkorlikni davom ettirishga intilishini tasdiqlagan. Uning ta’kidlashicha, xalqaro tashkilotlar ikki yoqlama standartlarning har qanday shakllaridan qochishlari kerak.
Koshta Pezeshkianga Isroil zarbalari oqibatida eronliklar halok bo‘lgani munosabati bilan hamdardlik bildirgan va G‘azodagi vaziyatga to‘xtalgan.
“Yevropa Ittifoqi Isroil tomonidan G‘azoda inson huquqlari buzilishini qoralaydi, darhol o‘t ochishni to‘xtatish, gumanitar yordam yetkazib berish va Falastin xalqiga samarali yordam ko‘rsatishni talab qiladi”, dedi Koshta.
Iyun oyi oxirida Eron prezidenti Mas’ud Pezeshkiyon Xalqaro atom energetikasi bo‘yicha agentlik (MAGATE) bilan hamkorlikni to‘xtatuvchi qonunni imzolagandi.
Isroil 13-iyun kechasi Eronga zarbalar berishni boshladi. Ularning maqsadi Tehronning yadro va raketa dasturlari bilan bog‘liq obyektlar edi. Bir sutkadan kamroq vaqt o‘tib, Eron javob hujumini amalga oshirdi. 22-iyun kechasi AQSH Qurolli kuchlari Eronning uchta yadroviy obyektiga hujum qildi, 23-iyun kechqurun esa Tehron Qatardagi Yaqin Sharqning eng yirik Al-Udeyd Amerika havo bazasiga raketa zarbalari berdi. Keyinroq AQSH prezidenti Donald Tramp Isroil va Eron o‘t ochishni to‘xtatish rejimiga kelishib olganini ma’lum qildi. Bu kelishuv 24-iyundan kuchga kirdi.
Izoh (0)