Яман ҳусийлари Қизил денгизда бир ҳафта ичида кетма-кет 2 та юк кемасини чўктирди. Бу ҳақда BBC хабар берди.
Eternity C кемаси экипажининг 6 нафар аъзоси қутқарилган, уларнинг камида 3 нафари ҳалок бўлган. Либерия байроқли, юнонлар бошқарувидаги кемада умумий 25 нафар одам бўлган. У 7 июль куни ракета гранаталари зарбасидан жиддий зарар кўриб, кема ўз бошқарувини бутунлай йўқотган.
Ҳужум 8 июль куни ҳам давом этган. Тунда қидирув-қутқарув ишлари бошланган. Эрон томонидан қўллаб-қувватланган ҳусийлар кемага “Исроилга кетаётгани учун ҳужум қилинганини” билдирган.
АҚШнинг Ямандаги элчихонаси ҳусийлар “ҳаёт бўлган кўплаб экипаж аъзоларини ўғирлаб кетгани”ни айтиб, уларни зудлик билан озод қилишга чақирган. Экипажнинг 21 нафар аъзоси филиппинлик ва яна бири россиялик экани билдирилган. Россиялик фуқаро ҳужумда оғир яраланиб, бир оёғидан айрилган.
Ҳусийлар 6 июль куни Magic Seas юк кемасига ҳам ракета ва дронлар учирган. Даъво қилинишича, кема “босиб олинган Фаластин портларига кириш тақиқини бузган компанияга тегишли” эди.
Гуруҳ томонидан 8 июль куни эълон қилинган видеода қуролланган одамлар кемага чиқиб, портлаш уюштирганига гувоҳ бўлиш мумкин. Кеманинг барча 22 экипажи ўтиб кетаётган савдо кемаси томонидан қутқариб қолинган.
Ҳусийлар 2023 йил ноябрь ойидан бери Қизил денгиз ва Адан кўрфазида ракета, дрон ва кичик қайиқлар билан 70 га яқин савдо кемаларига ҳужум қилган. Ҳозирда эса 4 та кема чўктириб юборилган. Бешинчи кема қўлга олинган ва унинг 7 нафар экипаж аъзоси ўлдирилган.
Изоҳ (0)