Истанбулда Украина ва Россия делегациялари учрашувидан кейин Туркия давлат раҳбарлари даражасидаги саммитни ташкил этиш ғоясини илгари сурмоқчи. Бу ҳақда Туркия президенти Ражаб Тоййиб Эрдўғон Вазирлар Маҳкамаси йиғилишидан сўнг маълум қилди. Унинг нутқи Х ижтимоий тармоғида жонли эфирда намойиш этилди.
У 2 июнь куни Истанбулда Россия ва Украина делегациялари учрашуви бўлиб ўтганини таъкидлаб, музокараларнинг янада юқори даражада давом эттирилишига умид билдирди.
“Бугун Истанбулда Россия ва Украина делегациялари учрашди. Бу жуда самарали учрашув бўлди”, деди давлат раҳбари.
Туркия президенти Истанбулни тинчлик ўрнатиш марказига айлантириш истаги борлигини билдирди.
“Мен Владимир Путин ва Владимир Зеленскийнинг Истанбул ёки Анқарада учрашишини истардим. Ҳатто Дональд Трамп ҳам бу учрашувга қўшилиши мумкин. Агар улар розилик билдирса, мен ҳам музокараларда иштирок этишга ва Истанбулни тинчлик ўрнатиш марказига айлантиришга ҳисса қўшишга тайёрман. Биз бу ташаббусни амалга ошириш учун зарур барча чораларни кўрамиз”, деди Туркия президенти.
Россия ва Украина делегацияларининг учрашуви 2 июнь куни ўтказилди. У бир соатдан ортиқ давом этди. Россия делегациясига Россия президенти ёрдамчиси Владимир Мединский, Украина делегациясига эса мамлакат мудофаа вазири Рустем Умиров раҳбарлик қилди.
Бундан аввал Туркия ташқи ишлар вазири Ҳоқон Фидан Россия ва Украина эҳтимолий ўт очишни тўхтатиш режимини амалга ошириш бўйича бир-бирга турлича талаблар қўймоқда ва ҳозирда уларни келиштириб олиш лозимлигини билдирганди.
15 май куни Анқарада Туркия президенти Ражаб Тоййиб Эрдўғон ва Украина президенти Владимир Зеленский ўртасидаги учрашув ўтказилди. Матбуот учун ёпиқ бўлган икки томонлама учрашув ва президент қароргоҳида делегациялар иштирокидаги ишчи тушлик 2 соат 45 дақиқа давом этганди.
Изоҳ (0)