Туркия президенти Ражаб Тоййиб Эрдўғон ўн нафар ҳуқуқшуносдан иборат экспертлар гуруҳи янги конституция устида ишлашга жалб этилганини айтди. Бу ҳақда TRT Global хабар берди.
Мен ўн нафар ҳуқуқшуносга лойиҳани тайёрлашни топширдим. Уларнинг фаолияти билан конституциявий ишларни бошлаймиз, деди Эрдўғон.
У асосий мақсад — ҳарбий тўнтаришлар даврининг изларидан холи бўлган янгиланган конституцияни яратиш эканини таъкидлади.
1982 йилги конституция ҳарбий режим изларини ўзида акс эттирган. Янги, фуқаролик конституцияси бу қолдиқлардан халос бўлиш ва ўтмишнинг оғир юкини ташлаш имконини беради, деб таъкидлади у.
Президент Туркия ҳукумати “янги конституцияни ҳуқуқ тизимига тўлиқ ва кенг қамровли эркинликлар хартияси сифатида киритишга қатъий аҳд қилганини” айтди. У бу жараёнда бошқа парламент партиялари ҳам иштирок этишига умид билдирди.
Эрдўғон 1960 йил 27 майдаги тўнтаришни “Туркия демократияси тарихидаги энг қора саҳифалардан бири” деб атади. Шунингдек, у катта масъулият талаб қиладиган террорсиз Туркияни таъминлаш бўйича ишларнинг янги босқичи бошланганини айтди.
Ҳар бир янги босқич билан нафақат умидимиз, балки масъулиятимиз ҳам ортиб бормоқда, дея қўшимча қилди у.
Туркия президенти 2024 йил амалдаги конституцияни “ҳарбий тўнтариш натижаси” деб атаганди. У мамлакатдаги айрим сиёсий кучлар иқтисодий ва ижтимоий муаммоларни айтиб, янги конституция масаласини кун тартибидан олиб ташлашга ҳаракат қилаётганини айтганди.
Изоҳ (0)