«Путин Украина билан музокаралар борасида юмшаган». Эрдўғон тез орада Путин ва Зеленский билан телефон орқали мулоқот қилади

Туркия президенти Ражаб Тоййиб Эрдўғон энг яқин вақтда Россия президенти Владимир Путин ва Украина президенти Владимир Зеленский билан телефон орқали мулоқот қилишини айтди, деб ёзади «РБК».

Эрдўғон Россия президенти билан сўнгги мулоқоти якунида Россия етакчисининг Украина билан музокаралар борасидаги позицияси юмшагани ҳақида таассуротга эга бўлган.

«Жаноб Путин [Киев билан] музокараларга олдингидан кўра юмшоқроқ ва очиқроқ муносабатда бўлаётганини кўрдим. Мен иккала етакчи билан ҳам энг яқин кунларда телефон орқали дипломатия олиб бориб, уларни тинглаб кўраман, бу қандай натижа бераркан — кўрамиз», — деди Эрдўғон.

Аввалроқ Туркия президенти Зеленский билан телефон орқали суҳбатлашганди. «У билан кечаги мулоқотимиз чоғида у томондан бундай тўсқинлик йўқлигини, у ҳам бу тўсиқни енгиб ўтиш тарафдори эканини ҳис қилдим», — деди у.

Туркия Украинадаги зиддиятни тартибга солишда ўзини кўп бора воситачи сифатида таклиф қилган. Хусусан, март охирида Истанбулда Анқаранинг таклифига кўра, Россия ва Украина делегациялари учрашуви бўлиб ўтганди. Бундан ташқари, Эрдўғон Путин ва Зеленский ўртасида икки томонлама учрашув ташкиллаштиришни кўп марта таклиф қилган. Москва бундай учрашув тинч йўл билан тартибга солиш бўйича лойиҳа ишлаб чиқилганидан кейингина ўтказилиши мумкин бўлишини таъкидлаган.

30 сентябрь куни Кремлда Донецк ва Луганск халқ республикалари ҳамда Украинанинг Херсон ва Запорожье вилоятлари босиб олинган қисмларининг «Россия таркибига кириши» ҳақида шартномалар имзоланди. Ўша куниёқ Украина ҳукумати НАТОга қўшилиш учун ариза берди. Зеленский ўшанда Россия билан мулоқотга тайёрлигини айтган, лекин «бошқа президент билан» деган эди.

4 октябрь куни эса Украина расман Путин билан ҳар қандай музокаралардан бош тортди.

Аввалроқ ОАВда Туркия расмийлари Россия ва етакчи Ғарб давлатлари ўртасида Истанбулда музокаралар ташкил этишга тайёрлиги ҳақида хабарлар тарқалган эди.

Шунингдек, 18 октябрь куни Анқара Путин ва Зеленскийни учраштиришнинг ҳозирча ҳеч қандай имкони йўқлигини билдиргани ҳақида хабар берилган эди.

19 октябрь куни Эрдўғон Украина етакчиси Владимир Зеленский билан телефон орқали мулоқот қилиб, уни мамлакатдаги можарони дипломатик усуллар билан ҳал қилишга чақирган ва унга «ҳар қандай шароитда ҳам» музокараларга рози бўлишни таклиф қилган эди.