Украинадаги низо дипломатик йўл билан якунланиши керак. Бу ҳақда АҚШ штаб бошлиқлари бирлашган қўмитаси раҳбари Марк Милли Киевни қўллаб-қувватлаш бўйича алоқа гуруҳининг Рамштайндаги учрашуви якунлари бўйича матбуот анжуманида айтиб ўтди.
«Бошқа кўплаб урушлар каби, бу уруш ҳам музокараларда эришилган келишув орқали тугаши керак, руслар ва украинлар музокаралар столига ўтирадиган вақт келди», — деди у.
Мамлакатлар ўртасидаги икки томонлама музокаралар май ойида Киевнинг ташаббуси билан тўхтатилган эди. 4 ноябрь куни эса Украина президенти Владимир Зеленский Владимир Путин президентлиги остидаги Россия билан музокаралар олиб боришни тақиқловчи фармонни имзолади. 25 ноябрь куни Украина ташқи ишлар вазири Дмитрий Кулеба Киев Москва билан музокараларга қарши эмаслигини, бироқ Украинанинг ҳудудий яхлитлиги қайта тикланганидан кейингина бунинг имкони бўлишини айтди.
Аввалроқ Украина президенти Владимир Зеленский ўзи учун Россия билан ярашув музокаралари имкониятини истисно қилмаётганини билдирганди. У 8 ноябрь куни Россия билан мулоқот бошлаш учун Украинанинг шартларини маълум қилганди. Улар эса Россияга қўшиб олинган ҳудудлар қайтарилган ҳолда Украина ҳудудий яхлитлигининг қайта тикланиши, БМТга ҳурмат, барча зарарларнинг қопланиши, ҳар битта ҳарбий жиноятчининг жазоланиши ва бу бошқа ҳеч қачон такрорланмаслигининг кафолатланишидан иборат эди.
Ноябрь ўрталарида Зеленский G20 саммитида видеомурожаат билан чиқиб, ўзининг ўнта шартдан иборат бўлган «тинчлик формуласи»ни таклиф этган эди.
10 январь куни Туркия ташқи ишлар вазири Мавлуд Чавушўғли Анқара Украина президенти Владимир Зеленскийнинг тинчлик формуласини қўллаб-қувватлашини маълум қилди.
Аммо Россия ҳукумати Киев билан Украина президенти Владимир Зеленский томонидан таклиф қилинган «тинчлик формуласи» низомлари асосида мулоқот олиб бормоқчи эмас. Украина раҳбариятининг тинчлик бўйича режаси концепциясини Россия ташқи ишлар вазири Сергей Лавров хомхаёл деб тавсифлади.
Изоҳ (0)