Япония сериалларида томошабинлар эътиборини тортадиган ўзига хос жиҳатлар ҳам бор. Қуйида турли жанрларда суратга олинган, эътибор қаратишга арзигулик япон дорамаларидан иборат тўплам тайёрладик.
“Ноодатий ўлим” (2018)
Мисуми Микото ажойиб патологоанатом ҳисобланади. У “Ғайритабиий ўлим” лабораториясида ишлайди. Laboрант Сёжи Юко ва янги ходим Кубе Рокуро билан биргаликда Мисуми турли жиноятлар қурбонларининг жасадларини ёриб ўрганади. Айнан уларнинг иши энг мураккаб ва чигал жиноятларни фош этишга ёрдам беради.
Ҳар бир қисми алоҳида ҳодисага бағишланган жиноий-тиббий сериал. Актёрларнинг моҳирона ижроси ва қизиқарли воқеалар ривожи томошабинни ўзига ром этади. Япониянинг ушбу сериали “C.S.I. Жиноят жойи”, “Денгиз полицияси: махсус бўлим”, “Жиноятчи каби фикрлаш” ва шунга ўхшаш фильмлар мухлисларига, шубҳасиз, маъқул келади.
“Ўқитувчининг кундалиги” (2018)
Суэнага Хидзири болаликдан ўқитувчи бўлишни орзу қилган. 25 ёшли аёл узоқ қишлоқда ўқитувчилик фаолиятини бошлайди. Унга иши жуда ёқади, бироқ Суэнагуни шахсий ҳаётида синовлар кутмоқда. Университетда ўқиётган пайтиданоқ учрашиб юрган севгилиси Осакага хизмат сафарига жўнаб кетади. Айрилиқ севишганлар учун ҳақиқий синовга айланади. Бунинг устига, юқори синф ўқувчиларидан бири тўсатдан Хидзирига севги изҳор қилади. Ўқитувчи унинг туйғуларига жавоб қайтаришга ҳаққи йўқлигини тушунади. Аммо кўп ўтмай Суэнага Акирага кўнгил қўя бошлаганини англайди.
Ушбу романтик сериал томошабинлар томонидан турлича баҳоланди. Кимдир унда романтика етишмади деса, бошқалар ўқитувчи ва ўқувчи ўртасидаги муҳаббатни ахлоқсиз деб ҳисоблади. Бироқ бир нарсани тан олиш керак — актёрлар ролларини ажойиб тарзда ижро этишган, уларнинг қаҳрамонлари бир-бирига нисбатан ҳис қилган туйғулар эса томошабинларни бефарқ қолдирмайди.
“Қочиш уят, лекин фойдали” (2016)
Микура Морияма — университетни тугатгандан сўнг нуфузли иш топа олмаган 25 ёшли қиз. Сузаки Ҳирамаса — уни уй бекаси сифатида ишга олишга қарор қилган 36 ёшли бўйдоқ эркак. Бироқ тез орада оилавий муаммолар туфайли Морияма барқарорроқ ва юқори маошли иш қидиришга аҳд қилади. Аммо Сузаки қизнинг уйидан кетишини хоҳламайди ва унга сохта никоҳга киришишни таклиф этади.
Бу дораманинг ўзига хос хусусияти шундаки, бош қаҳрамонларнинг ҳис-туйғулари ва ўзаро муносабатлари табиий кўринади. Ҳикоянинг ҳазил-мутойиба услубига қарамай, керакли пайтларда сериал жиддий тус олади.
“Қаҳва ва ванил” (2019)
Риса — ақлли, гўзал қиз бўлиб, атрофида ошиқлари сарсон. Аммо у ҳеч ким билан муносабат ўрнатишга шошилмайди, чунки яқин орада ўз инсонини учратишига ишонади. Кунларнинг бирида тақдир уни 30 ёшли тадбиркор Фуками Хирото билан юзлаштиради. Ташқи кўринишидан бу одам совуққон ва киришимсиз туюлса-да, у нима хоҳлаётганини ва бунга қандай эришиш мумкинлигини аниқ билади. Фуками Риса билан биринчи учрашувдаёқ унинг ҳаётидаги биринчи ва ягона эркак бўлишга қатъий қарор қилади.
“Азиз синглим” (2014)
Мисаки ва Хазуки бир-бири билан келиша олмайдиган опа-сингиллар. Мисаки худди шамолдек беқарор, унинг эртага қаерда бўлиши ва нима қилишини олдиндан айтиб бўлмайди. Хазуки эса аксинча, жуда масъулиятли қиз бўлиб, тўйга тайёргарлик кўрмоқда ва давлат муассасасида ишлайди. Узоқ йиллар давомида опа-сингиллар бир-бирлари билан гаплашмайди, чунки ҳар сафар учрашув жанжал билан тугайди. Кутилмаганда Мисаки синглисининг уйига келиб, унинг тўйини бузади ва кейин у билан бирга яшашини эълон қилади.
Бу жуда қизиқарли ва жўшқин драма бўлиб, унинг сюжетида кўплаб долзарб муаммолар очиб берилган. Опа-сингиллик муҳаббатининг аста-секин уйғониши ҳам жуда таъсирли тасвирланган.
Изоҳ (0)