Тошкент вилояти Паркент туманида эшак гўштидан сомса тайёрлаб, сотганларга ҳукм ўқилди.
Маълум қилинишича, Нурафшон шаҳрида фуқаро ўндан ортиқ эшакни сўйиб, сотиб келган. Ҳолат юзасидан суд мажлиси ўтказилиб, айбдорларга чора кўрилди.
Суд ҳужжатига кўра, айбланувчилардан бири Нурафшон шаҳрида сўйилган ҳайвонларнинг гўштини пишириш учун сотиш мақсадида олиб кетаётган вақтида ушланган. У Тошкент шаҳрида яшовчи фуқарога 200 кг эшак гўштини килограммини 20 минг сўмдан сотмоқчи бўлган.
Тошкент шаҳридаги фуқаро эса 193 кг эшак гўштини 3,8 миллион сўмга сотиб олаётган вақтида ушланди. Унинг уйидан келиб чиқиши номаълум қўшимча 60 кг гўшт топилган. У Паркент туманида жойлашган тез овқатланиш шохобчасида сомса тайёрлаш учун ушбу гўштдан фойдаланган.
Ҳолат бўйича уч нафар судланувчига ҳукм ўқилди. Жиноят ишлари бўйича Оҳангарон туман судининг ҳукми билан Жиноят кодексининг 186-моддаси 2-қисми билан айбли деб топилди ва уларнинг 2 нафарига 2 йил муддатга озодликдан маҳрум қилиш жазоси тайинланди. 3-судланувчи эса 3 йил 8 ой 15 кунга озодликдан чекланди.
Оққўрғон туманида эшак суякларининг сувга ташлаб кетилаётгани ҳолатидан бошланган тадбир Оҳангарон туманида давом эттирилиб, 3 нафар шахс гумонланувчи сифатида ушлангани ва терговга қадар суриштирув олиб борилаётгани ҳақида хабар берилган эди.
Ижтимоий тармоқларда Сурхондарё вилоятида фуқароларнинг эшак сўйгани айтилган ва ҳайвонлар жасади кўринган видео тарқалганди. Вилоят ҳокимлиги ахборот хизмати раҳбари бу эски видео эканлигини билдирган.
Куни кеча эса Сирдарёдан Тошкентга олиб кетилаётган 361 кг эшак гўшти тўхтатиб қолинган.
Маълумот учун, эшак териси ва ичаги тиббиётда субтовар сифатида фойдаланилади. Қонунчиликда эшак гўштини истеъмол қилиш ёки сотганлик учун жавобгарлик йўқ. Фақат эшак гўштини бошқа ҳайвон, масалан, мол гўшти деб сотганлик учун жавобгарлик мавжуд.
Изоҳ (0)