АҚШ МРБ раҳбари Туркияда Россия Ташқи разведка хизмати директори билан учрашиб, ядро қуролидан фойдаланиш оқибатлари ҳақида огоҳлантирди

Туркия пойтахти Анқарада АҚШ Марказий разведка бошқармаси (МРБ) директори Уильям Бёрнс ва Россия Ташқи разведка хизмати (ТРХ) раҳбари Сергей Наришкин ўртасида учрашув бўлиб ўтди, деб ёзади CNN. Унда «Россия томонидан ядро қуроли қўлланилиши оқибатлари» муҳокама қилинди.

«У Россия томонидан ядро қуролидан фойдаланилиши оқибатлари ва зиддиятнинг кучайиши стратегик барқарорлик учун қанчалик хавфлилиги  ҳақидаги хабарни етказмоқда», — дея CNN’га маълум қилди АҚШ Миллий хавфсизлик кенгаши вакили Бёрнснинг ушбу учрашувдаги позициясини изоҳлар экан.

Украинада низони тартибга солиш масаласи ушрашувда муҳокама этилгани йўқ, деб ёзади CNN. «Биз ўзимизнинг бош принципимизга қатъий амал қиламиз: Украинасиз Украина ҳақида бир оғиз ҳам гапирмаслик», — дея таъкидлади Миллий хавфсизлик кенгаши вакили. Унинг қайд этишича, АҚШ Бёрнснинг Наришкин билан учрашуви ҳақида Киевни олдиндан хабардор қилган.

CNN суҳбатдошига кўра, АҚШ ядровий эскалацияга йўл қўймаслик мақсадида Россия билан алоқа каналларини сақлаб туришда давом этмоқда — учрашув ҳам ушбу стратегия доирасида бўлиб ўтган.

The Wall Street Journal нашри бир ҳафта аввал АҚШ президентининг миллий хавфсизлик бўйича маслаҳатчиси Жо Салливан Россия президенти ёрдамчиси Юрий Ушаков ва Россия Хавфсизлик кенгаши котиби Николай Патрушев билан сўнгги ойларда бир қатор учрашувлар ўтказгани ҳақида хабар берганди. Ушбу учрашувларда ҳам, нашр маълумотларига кўра, Украинадаги вазиятни тартибга солиш эмас, алоқа каналларини ушлаб туриш муҳокама қилинган.

7 ноябрь куни Украина президенти Владимир Зеленский Россия билан мулоқот бошлаш учун Украинанинг шартларини маълум қилганди. Улар эса Россияга қўшиб олинган ҳудудлар қайтарилган ҳолда Украина ҳудудий яхлитлигининг қайта тикланиши, БМТга ҳурмат, барча зарарларнинг қопланиши, ҳар битта ҳарбий жиноятчининг жазоланиши ва бу бошқа ҳеч қачон такрорланмаслигининг кафолатланишидан иборат эди.

Россия президенти Владимир Путин Украина билан музокараларга шайлигини билдирган, аммо улар Россия шартлари билан ўтказилишини айтганди. Meduza манбаларига кўра, Россия Украинага янги ҳужумга тайёрланиш учун вақтинчалик сулҳ тузиш истагида.