НАТО бош котиби Марк Рютте агар Ҳиндистон, Хитой ва Бразилия Россия билан савдони давом эттирса, АҚШнинг иккиламчи санкциялари туфайли жиддий оқибатларга юзлашишидан огоҳлантирди. Бу ҳақда у АҚШ Конгресси сенаторлари билан учрашувда маълум қилди.
АҚШ президенти Дональд Трамп 14 июль куни Рютте билан учрашув ўтказган эди. Ўшанда у Россия 50 кун ичида Украина бўйича тинчлик келишувини тузмаса, унинг савдо ҳамкорларига 100 фоизлик бож жорий этишини айтган.
Мен мазкур уч давлатга — Ҳиндистон, Хитой ва Бразилияга мурожаат қиламан... Бу ҳақда жиддий ўйлаб кўришингиз керак. Акс ҳолда, бу сизга жуда катта зарар етказиши мумкин, деган НАТО бош котиби.
Шунингдек, Рютте бу давлатларни Россия президенти Владимир Путинга қўнғироқ қилиб, уни тинчлик музокараларига ундашга чақирган. Трамп эса Россия президентидан “ҳафсаласи пир бўлганини” билдирган. Бироқ у билан ҳали “хайрлашмагани”ни ҳам алоҳида таъкидлаган. АҚШ президенти, шунингдек, Россия раҳбари билан мулоқот қилишдан ҳеч қандай фойда йўқлигини айтган.
У билан урушни тўхтатиш кераклиги ҳақида кўп гаплашаман. Гўшакни қўйиб, ажойиб суҳбат бўлди дейман. Кейин яна ракеталар уча бошлайди. Бу ғалати. Бундай ҳолат 3-4 марта такрорлангач, суҳбатлардан ҳеч қандай маъно йўқлигини тушуниб етдим, деган эди у.
Кремль муносабати
Россия президенти матбуот котиби Дмитрий Песков Трампнинг баёнотларига муносабат билдирар экан, уларни “жуда жиддий” деб баҳолади. У Россия президенти америкалик ҳамкасбининг сўзларига “агар ва қачон зарур деб ҳисобласа” изоҳ беришини айтди.
Россия Хавфсизлик кенгаши раис ўринбосари Дмитрий Медведев эса Трампнинг даъволарига жавоб қайтарди. У АҚШ президентининг 50 кунлик муҳлатини “декоратив ультиматум” деб атади ва Россия учун бундай таҳдидлар ҳамиятга эга эмаслигини билдирди.
Кремлдаги манбаларга кўра, Россия президенти маамлакат иқтисодиёти ва армияси Ғарбнинг янги санкцияларига бардош бера оладиган даражада кучли эканига ишонади. Шунинг учун ҳам у АҚШ томонидан Россия нефтини харид қилувчиларга нисбатан бож жорий этилиши каби иқтисодий босимларга тайёр турибди.
Изоҳ (0)