Agar Rossiya va Ukraina o‘rtasida 50 kun ichida kelishuv bo‘lmasa, AQSH Rossiyaga qarshi “juda qattiq” bojlar joriy etadi. Bu haqda AQSH prezidenti Donald Tramp NATO bosh kotibi Mark Ryutte bilan o‘tkazilgan matbuot anjumanida ma’lum qilgan.
Tramp Rossiya Federatsiyasi prezidenti Vladimir Putin bilan tez-tez suhbatlashishini, ammo bu suhbatlar natija bermasligini, chunki Rossiya rahbari boshqalarni aldashda davom etayotganligini bildirgan.
“Men u bilan urushni to‘xtatish kerakligi haqida ko‘p gaplashaman. Go‘shakni qo‘yib, ajoyib suhbat bo‘ldi deyman. Keyin yana raketalar ucha boshlaydi. Bu g‘alati, deb o‘ylayman. Bunday holat 3-4 marta takrorlangach, bu suhbatlarning hech qanday ma’nosi yo‘qligini tushunib yetdim”, deydi Tramp.
“U usta odam. U ko‘p kishilarni aldadi. Bush, Klinton, Obama, Baydenni, lekin meni aldolmadi”, deya qo‘shimcha qilgan Amerika prezidenti.
Oq uy rahbarining aytishicha, unga Ukraina bo‘yicha kelishuv allaqachon bir necha bor tuzilgandek tuyulgan.
“Menga shunday tuyuldiki, biz Ukraina bo‘yicha to‘rt marta kelishuvga erishdik, endi esa uni tuzish haqida gapirishda davom etmoqdamiz”, dedi u.
AQSH prezidenti Rossiyaning tinch hamkorlik uchun salohiyatini alohida ta’kidlagan.
“Bilasizmi, agar ular o‘z resurslarini urush uchun emas, balki boshqa maqsadlarda ishlatsa, uning mamlakati savdo va boshqa sohalar uchun ajoyib imkoniyatlarga ega. Uning salohiyati juda katta. Men shunday degan bo‘lardim”, deydi Oq uy rahbari.
Ukrainadagi vaziyat keskinlashganda qanchalik uzoqqa borishga tayyorligi haqidagi savolga AQSH prezidenti “Menga bunday savollarni bermang”, deya javob bergan. Shu bilan birga, u mojaroni hal qilishga tayyorligini ta’kidlagan.
NATO bosh kotibi Mark Ryutte Trampning bayonotlarini qo‘llab-quvvatlab, ularni “Ukraina uchun ajoyib yangilik” deb atagan.
“Agar men Vladimir Putinning o‘rnida bo‘lganimda va siz keyingi 50 kun ichida nimalarni rejalashtirayotganingizni eshitganimda, Ukraina bilan muzokaralar stoliga o‘tirish kerakmi, deb o‘ylardim”, dedi Ryutte.
AQSH senatorlari 13-iyul kuni prezident Donald Trampga Rossiyaga qarshi keskin sanksiyalar kiritish to‘g‘risida taklif berdi. Unda Moskvaga yordam beradigan davlatlarga 500 foizlik boj solish nazarda tutilmoqda.
Shuningdek, Donald Tramp Ukrainaga Patriot havo hujumidan mudofaa raketalarini yuborishini maʼlum qildi.
Izoh (0)