АҚШ сенаторлари 13 июль куни президент Дональд Трампга Россияга қарши кескин санкциялар киритиш тўғрисида таклиф берди. Унда Москвага ёрдам берадиган давлатларга 500 фоизлик бож солиш назарда тутилмоқда. Бу ҳақда Arab News хабар берди.
АҚШ сенати Москвага кескин санкция киритиш борасида янги қонун лойиҳасини ҳам имзолаган. Республикачи сенатор Линдси Грем ушбу лойиҳани Сенатда кўпчилик қўллаб-қувватлаганини билдирган. Санкциялар Россия иқтисодиёти ва Путинни қўллаб-қувватлаётган барча мамлакатларни нишонга олиши айтилган.
“Биз кўриб чиқаётган ушбу санкция пакети Россияга ёрдам берадиган ҳар қандай давлатга 500 фоизлик божлар жорий этишни назарда тутади. Бу Хитой, Ҳиндистон ёки Бразилия каби Россия товарларини сотиб оладиган мамлакатларни ўз ичига олиши мумкин. Бундан боёғига қарор қабул қилиш президентнинг ихтиёрида”, деди Грем.
Трамп россиялик ҳамкасби Владимир Путин билан муносабатлар тобора “совуқлашиб” бораётгани сабабли санкциялар тўғрисидаги қонун лойиҳасига очиқлигини билдирган. У 14 июль куни “Россия бўйича катта баёнот” беришини маълум қилган.
АҚШ президенти сўнгги 6 ой давомида Путинни урушни тўхтатишга ундаб келмоқда. Аммо унинг сабри сўнгги кунларда тугаб бораётганга ўхшайди. Сабаби у Путиндан “ҳафсаласи пир бўлганини” бир неча бор таъкидлаган.
Ўтган ҳафта Трамп Украинага кўпроқ қурол-яроғ юборишини ва Киев қуролларини сотиб олишига рози бўлганини маълум қилганди. АҚШ президенти сенатнинг санкциялар тўғрисидаги қарори ҳақида шундай деди:
“Улар жуда йирик ва кескин санкциялар тўғрисида қонун лойиҳасини қабул қилмоқчи. Аммо буни амалга ошириш ҳақида қарор қабул қилиш президентга боғлиқ. Уни интизорлик билан кутяпман”.
Ушбу санкциялар борасида Украина президенти Владимир Зеленский Х’да шундай пост қолдирган:
“Шубҳасиз, бу тинчликка йўл очиб, дипломатия бўш эмаслигини исботлайди”.
Изоҳ (0)