Хитой фуқароси, 39 ёшли Дин Юанчжао ўз мамлакатида “Етказиб бериш хизматининг энг билимли курери” сифатида танилди. South China Morning Post нашрининг ёзишича, фан номзоди унвонини олган ҳамда Оксфордни тамомлаган эркак илм-фан орзусини амалга ошира олмаган ва шундан сўнг у яхши даромад келтирадиган иш топишга қарор қилган.
Диннинг ҳикояси бутун Хитойда машҳур бўлди ва собиқ олимнинг ўзи нима учун касбини кескин ўзгартирганини айтиб берди. Эркакнинг сўзларига кўра, у бир қатор дипломларга эга — Пекин университетининг кимё бўйича бакалаври ва энергетика муҳандислиги бўйича магистри. Кейинчалик Сингапурдаги технология университетида биология бўйича диссертация ёқлаб, Оксфордда “Био хилма-хиллик” мутахассислиги бўйича диплом олди.
Бироқ мутахассислиги бўйича муносиб иш топа олмади. Диннинг айтишича, у меҳнат бозорида қийинчиликларни бошдан кечирган — кўплаб резюмелар юборган, ўндан ортиқ суҳбатлардан ўтган, аммо нуфузли лавозимга кира олмаган.
Дастлаб олим репетитор бўлишни ўйлаган, бироқ ўқувчилар олдидаги уятчанлиги туфайли бу фикридан қайтган. “Аммо кейинчалик Сингапурда ўқиб юрган кезларимда озиқ-овқат етказиб бериш хизматида қўшимча пул ишлаганим ёдимга тушди. Шунинг боис, тирикчилик учун маблағ қолмагач, яна шу ишга киришдим”, деди у.
Охир-оқибат, у ҳафтасига тахминан 550 доллар маош оладиган етказиб бериш хизматига ишга кирди. Диннинг сўзларига кўра, у ўз ҳаётидан мамнун ва энди мартаба амбициялари ҳақида қайғурмайди.
Форумларда у ўз тажрибаси билан ўртоқлашади ва ёшларга олий ўқув юртига киришда ёки иш қидиришда муваффақиятсизликка учраганидан хафа бўлмасликни маслаҳат беради: унинг фикрича, таълим ҳар доим ҳам ҳаёт йўлини белгиламайди.
“Бу — барқарор иш. Ҳозирги иш ҳақим билан оиламни таъминлай оламан. Агар тиришқоқлик билан ишласанг, яхшигина пул топиш мумкин. Бу, ҳар ҳолда, ёмон иш эмас. Овқат етказиб беришнинг афзалликларидан бири шундаки, бир вақтнинг ўзида машқ қилиш ҳам мумкин”, деди хитойлик етказиб берувчи.
Диннинг таъкидлашича, касб инсоннинг қадр-қимматини белгиламайди, лекин кўпинча оддий соҳаларда таълим даражаси мутаносиб бўлган одамларни кўриш мумкин. Собиқ олимнинг ишончи комилки, етказиб берувчининг иши муҳим ва зарур, чунки у оилани боқиш ва жамиятга фойда келтириш имконини беради.
Журналистларнинг ёзишича, Хитой ижтимоий тармоқларида кўпчилик Юанчжаони қўллаб-қувватлаган. Фойдаланувчилар инсон хатти-ҳаракатлари ва масъулияти “таълим қадрияти”дан кўра муҳимроқ эканини таъкидлади ва баъзи муаллифлар собиқ олимни қўллаб-қувватлади ҳамда унинг қарорига қойил қолишди, “унинг барқарорлиги ва ҳаётий муаммоларга ижобий ёндашуви”ни қўллаб-қувватлашди.
Изоҳ (0)