Xitoy fuqarosi, 39 yoshli Din Yuanchjao o‘z mamlakatida “Yetkazib berish xizmatining eng bilimli kuryeri” sifatida tanildi. South China Morning Post nashrining yozishicha, fan nomzodi unvonini olgan hamda Oksfordni tamomlagan erkak ilm-fan orzusini amalga oshira olmagan va shundan so‘ng u yaxshi daromad keltiradigan ish topishga qaror qilgan.
Dinning hikoyasi butun Xitoyda mashhur bo‘ldi va sobiq olimning o‘zi nima uchun kasbini keskin o‘zgartirganini aytib berdi. Erkakning so‘zlariga ko‘ra, u bir qator diplomlarga ega — Pekin universitetining kimyo bo‘yicha bakalavri va energetika muhandisligi bo‘yicha magistri. Keyinchalik Singapurdagi texnologiya universitetida biologiya bo‘yicha dissertatsiya yoqlab, Oksfordda “Bio xilma-xillik” mutaxassisligi bo‘yicha diplom oldi.
Biroq mutaxassisligi bo‘yicha munosib ish topa olmadi. Dinning aytishicha, u mehnat bozorida qiyinchiliklarni boshdan kechirgan — ko‘plab rezyumelar yuborgan, o‘ndan ortiq suhbatlardan o‘tgan, ammo nufuzli lavozimga kira olmagan.
Dastlab olim repetitor bo‘lishni o‘ylagan, biroq o‘quvchilar oldidagi uyatchanligi tufayli bu fikridan qaytgan. “Ammo keyinchalik Singapurda o‘qib yurgan kezlarimda oziq-ovqat yetkazib berish xizmatida qo‘shimcha pul ishlaganim yodimga tushdi. Shuning bois, tirikchilik uchun mablag‘ qolmagach, yana shu ishga kirishdim”, dedi u.
Oxir-oqibat, u haftasiga taxminan 550 dollar maosh oladigan yetkazib berish xizmatiga ishga kirdi. Dinning so‘zlariga ko‘ra, u o‘z hayotidan mamnun va endi martaba ambitsiyalari haqida qayg‘urmaydi.
Forumlarda u o‘z tajribasi bilan o‘rtoqlashadi va yoshlarga oliy o‘quv yurtiga kirishda yoki ish qidirishda muvaffaqiyatsizlikka uchraganidan xafa bo‘lmaslikni maslahat beradi: uning fikricha, ta’lim har doim ham hayot yo‘lini belgilamaydi.
“Bu — barqaror ish. Hozirgi ish haqim bilan oilamni ta’minlay olaman. Agar tirishqoqlik bilan ishlasang, yaxshigina pul topish mumkin. Bu, har holda, yomon ish emas. Ovqat yetkazib berishning afzalliklaridan biri shundaki, bir vaqtning o‘zida mashq qilish ham mumkin”, dedi xitoylik yetkazib beruvchi.
Dinning ta’kidlashicha, kasb insonning qadr-qimmatini belgilamaydi, lekin ko‘pincha oddiy sohalarda ta’lim darajasi mutanosib bo‘lgan odamlarni ko‘rish mumkin. Sobiq olimning ishonchi komilki, yetkazib beruvchining ishi muhim va zarur, chunki u oilani boqish va jamiyatga foyda keltirish imkonini beradi.
Jurnalistlarning yozishicha, Xitoy ijtimoiy tarmoqlarida ko‘pchilik Yuanchjaoni qo‘llab-quvvatlagan. Foydalanuvchilar inson xatti-harakatlari va mas’uliyati “ta’lim qadriyati”dan ko‘ra muhimroq ekanini ta’kidladi va ba’zi mualliflar sobiq olimni qo‘llab-quvvatladi hamda uning qaroriga qoyil qolishdi, “uning barqarorligi va hayotiy muammolarga ijobiy yondashuvi”ni qo‘llab-quvvatlashdi.
Izoh (0)