Бу аёл шарқона камтарлик ва итоаткорликни қачон кўрсатиш ва мақсадига эришиш учун қандай ҳаракатланиш кераклигини жуда яхши билади.
Инглиз тили дарсидан Калифорниягача
Венди Денг бой оиладан чиқмаган. Унинг оиласи ойлик даромади икки юз доллардан ошмайдиган Хитойнинг кичик Сючжоу шаҳрида яшар эди. Манхеттеннинг бўлажак юлдузи ўша пайтда Венгге Денг исмли оддий мактаб ўқувчиси эди. 70 йилларда Хитой аста-секин ўзининг “иқтисодий мўжизаси”га эришаётганди, лекин ҳали фуқароларига ҳеч қандай қулайлик таклиф қила олмасди — масалан, ўша пайтларда Денг оиласида кечқурун “свет” ва газ бўлмасди. Аммо ёш Венге, синфдошларининг эслашларича, болалигидан дабдабали ҳаётни, юқори мавқени ва Хитойдаги кўпчилик сингари — эркин капиталистик Американи орзу қилган.
Қиз мактабда ўқиб юргандаёқ Америкага кетиш режасини ишлаб чиқади — чексиз инглиз тили дарслари ва дўстлари билан бекорга вақт ўтказмаслик режасининг асоси эди. Охир-оқибат қизнинг капиталистик тилни эгаллаши натижа беради. Калифорниялик бизнесменлар оиласи — Черрилар Венгенинг шаҳрига келганида, у дарҳол ўзининг хитойча исмини американча “Венди”га ўзгартириб, уларга кўнгилли тарзда таржимон бўлади.
Кейинчалик Черрилар оиласи туфайли 20 ёшли Венди Жанубий Калифорнияга кўчиб ўтади, у ерда официант бўлиб ишга киради, сўнг Йел университетига ўқишга киради. У аълочи талаба бўлади ва кўплаб ақлли курсдошларидан фарқли ўлароқ, ажойиб карьера ҳам қуришнинг уддасидан чиқади.
Мердок, Блейр, Путин ва Вендининг бошқа “йигитлари”
Кўпчилик Америка орзусида билими ва ақли ёрдамида карьера қурган бўлса, Венди эркаклар қалбига йўл топиб, бой бўлишга қарор қилади. Маълумки, қиз Черри хонимнинг саъй-ҳаракатлари туфайли АҚШга кўчиб келган, хоним бу хитойлик қизни жуда ёқимтой деб билган. Кейинчалик жаноб Черри Green Card олиш учун унинг америкалик биринчи турмуш ўртоғи бўлади, бунинг натижасида қиз бой бизнесмен Девид Вулф билан танишади, унинг оиласи мафтункор хитойлик аёлнинг Елдаги қиммат MBA курслари учун пул тўлайди.
Уларнинг ишқий муносабатлари шу қадар тез ривожланадики, бир йил ҳам ўтмай, 68 ёшли Руперт Вендига турмуш қуришни таклиф қилади
Йел унга Гонконгдаги Star TV’да амалиёт ўташ имкониятини беради — кейинчалик компанияни энг бой медиамагнат, “оммавий ахборот воситалари қироли” Руперт Мердок сотиб олади. Star TV’ни “ўзиники” қилиш учун компанияда оддий стажёр бўлган қиз доимий равишда хўжайинга маслаҳатлар бера бошлайди (албатта, у Хитойда бизнесни қандай ривожлантириш ҳақида яхши биларди). Венди ниҳоят Мердокка таржимон бўлиб олади ва уни йўлдан оздиришга муваффақ бўлади. Уларнинг ишқий муносабатлари шу қадар тез ривожланадики, бир йилга ҳам бормай 68 ёшли Руперт Вендига турмуш қуришни таклиф қилади. Шу билан бирга, Соҳодаги ҳашаматли уй ва бошқа кўчмас мулклари, Morning Glow яхтаси, бизнеси ва кўп миллиард долларлик активларини ҳам қўшиб беради.
Аммо Рупертнинг чиройли рафиқаси унга қимматга тушади: тўйдан бир неча ҳафта ўтгач, “ахборот қироли” хитойлик аёлнинг оёқлари остида эди, қизиғи, у ҳеч қачон хотинидан шикоят қилмайди. Мердок уйидаги энаганинг айтишича, Венди бизнес, болалар мероси ва шунчаки майда-чуйда нарсаларни деб эрига тез-тез бақириб турган. Аммо у турмуш ўртоғини қачон ҳимоя қилишни ҳам биларди: масалан, Британия парламентида Мердокнинг News of the World газетаси томонидан уюштирилган машҳур шахсларнинг телефон суҳбатини тинглаш бўйича суд жараёнида залда кимнингдир Рупертга қарши айтган икки оғиз сўзига жавобан Венди ўрнидан сакраб туради ва ҳалиги одамга ташланиб қолади.
Мердок билан турмуш қургач, хитойлик аёл бирин-кетин бизнес лойиҳаларида қатнаша бошлайди: у компаниянинг Хитойдаги филиалини ривожлантиради. Star TV телеканалининг ўз ватанида My Space тармоғини ишга туширишга ёрдам беради. Кейинчалик Денг ўзининг продюсер сифатидаги истеъдодини кашф этади ва иккита фильм чиқаради.
Детективлар Мердокка Вендининг Буюк Британия собиқ бош вазири билан бўлган муносабати ҳақида далиллар йиғиб беришади
Хитойлик аёлнинг лойиҳалари миллиардерлар — эрининг дўстлари ёрдамисиз амалга ошмасди, албатта, лекин Венди уларнинг ҳеч бири билан қўлга тушмайди, шунинг учун кекса Руперт хотиржам ақлли хотини билан фахрланишни давом эттириши мумкин эди. Аммо 14 йилдан кейин эр-хотин ниҳоят ажрашишга қарор қилади. Детективлар Венди Мердокнинг хиёнатига оид далилларни эрига тақдим этишади: маълум бўлишича, унинг рафиқаси Рупертнинг яқин дўсти ва Буюк Британиянинг собиқ бош вазири Тони Блейрга анчадан бери яқин бўлган. Албатта, Венди ҳам, Блейр ҳам буни тан олмайди, лекин илгари Вендининг бошқа эркакларга қилган ноз-карашмасига кўз юмган Рупертнинг ҳаракатларига қараганда, хитойлик аёл ва сиёсатчи ўртасида шунчаки дўстликдан бошқа нарсалар ҳам бўлган.
Ҳар ҳолда Мердокдек одам билан ажрашиш Вендига турмуш қуришдан ҳам кўпроқ фойда келтиради. У катта миқдорда товон пули ундиради, ҳатто икки қизи учун ишонч фондидан улуш олишга муваффақ бўлади. Вендининг Блейр билан бўлган муносабати ҳақидаги миш-мишлардан сўнг, ОАВ унинг деярли барча нуфузли сиёсатчилар билан муносабатларга эга бўлгани ҳақида ёзади — улар орасида Россия президенти Владимир Путин ҳам бор эди (кейинчалик Американинг Vogue журналига берган интервьюсида Венди у билан таниш эмаслигини тан олади).
Таниш орттириш борасидаги “истеъдоди”
Бир марта Венди журналистларга: “Ҳамманинг эътиборини жалб қилиш учун ақлли бўлиш керак”, деганди. Дарҳақиқат, хитойлик аёл ҳар доим керакли одамлар билан танишиш учун етарлича ақлли эди: у шу йўл билан Елга киради, кейин Мердок компаниясида стажировка ўтайди, Рупертга турмушга чиққач эса зодагон элиталардан бирига айланади.
Масалан, эрининг танишлари туфайли у Иванка Трамп билан танишади. Ўша пайтда Иванка бўлажак эри Жаред Кушнер билан диний келишмовчиликлар туфайли ажрашганди. Айнан Денг жуфтликни ўзи ташкил этган яхта саёҳатида яраштириб қўяди. Бир оз вақт ўтгач, Иванка ва Жаред турмуш қуради ва Венди оиланинг қадрдон дўстига айланади (Иванка ҳатто дугонасини отасининг инаугурациясига таклиф қилади).
Бундан ташқари, Денг Роман Абрамовичнинг собиқ рафиқаси Даша Жукова билан ҳам дўстлашади — ҳозирда улар Artsy қўшма бадиий лойиҳасини ҳам биргаликда олиб боришмоқда. Денг Владимир Путинни билишини инкор этса-да, Венди Россия раҳбарининг ишончли одамининг оиласини жуда яхши билади.
Нима бўлганда ҳам, хитойлик аёл манфаат кўзлаб танишишда давом этаётганга ўхшайди, чунки энди “бечора хитойлик қиз” одамлар у билан дўстлашмоқчи бўлган мавқега эришди.
Изоҳ (0)